Ñahendu Hesu Ñe’ê. Miércoles III de Cuaresma

Escucha el evangelio y la reflexión en: https://youtu.be/g4LhJZzr7Fg

Miércoles III Cuaresma Mateo 5, 17 – 19.

Upérõ Jesús he’i hemimbo’ekuérape: Ani peimo’ã che ajuha amboyke haguã Moisés mandamiénto, térã umi mba’e proféta kuéra ombo’éva ymaite guive. Nahániri.

Ndajúi amboykévo umíva. Aju katu umíva ojehupa haguã hekoitépe. Añetéko ha’e peẽme. Yvága ha yvy oĩ aja, mba’evete asy ndojepe’a mo’ãi Moisés mandamiéntogui, ojehupa peve pe ipype oĩva. Upévare, pe omboykéva Ñandejára mandamiénto ha ojapo’ỹva pe michĩvéva jepe, térã omboligáva hapichápe péicha ojapo haguã, upévata hína pe michĩvéva Ñandejára Rréinope. Ha pe Ñandejára mandamiénto ojapóva ha ombo’éva hapichápe katu, péva tuicháta hína Ñandejára Rréinope.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Pe ñande rogapýpe ñande jaikuaa heta mba’e: ñamba’apo va’erãha, ñañepytyvõ, ñañangareko michĩvévare, ñaneñe’ẽ rendu ñande ru ha ñande sýpe, jajorrespeta, ñamboja’o jarekóva, ñañomoĩ porã jey jaiko vai rire ñande rogagua ndive, ani jajavyky ndaha’éiva ñane mba’e, ñamopotĩ pe jaiporu va’ekue, jahechakuaa tekotevẽva jajapo oje’e mboyve ñandéve. Ñande ru ha ñande sy oñemoñe’ẽva ñandéve ha ñanerekombo’e ñamomba’e vaerãha Ñandejára ha Tupãsýme, ñañembo’e ha jaha tupaópe.

Upéi jaju jakakuaa ha ñande jehegui, ha sapy’ánte ñanderesarái ã mba’égui, ñaimo’ã ñande jaikuaaha iporãvéva, térã katu ñaneñe’ẽ rendu ambue ñande rapichápe ha ñamboyke ñande ypykue ñanembo’e va’ekue.

Jesús he’i iñirũ nguérape ha’e ndoúi hague ombogue térã omboyke haguã umi Moisés ombo’e va’ekue. Umi 10 mandamiento Ñandejára ome’ẽ va’ekue ipuéblo Israélpe ojeapo vaerã mba’éramo, umíva ha’e cimiento Ñandejára omoĩ va’ekue upéi ou haguã Hesu omohu’ã.

Ha péicha avei umi mba’e porã oñembo’e vaekue ñandéve ñanemoĩva Ñandejára rapépe ha jeikokuaa ñande rapicha, ñande rogapy ha ñande komunida ndive, ha’e hína ñane cimiento, jaguerúva ñande ypykuégui. Umíva ári jakakuaa vaerã ha ñamopu’ã jahávo ñande rekove jaguatávo jerovia rapére.

Aipo ramo che reindy ha nde che irũ, ani rekyhyje eheja haguã Hesu oike nde rekovépe, ha’e niko ndoúi oipe’ávo nde hegui umi mba’e porã erekómava, omoporãve ha ombochovi haguã nde rekove jehovaságui uvei.

Pa’i Alberto Luna.