Ñahendu Hesu Ñe’ẽ. Miércoles IV Cuaresma

Escucha el evangelio y la reflexión en: https://youtu.be/ebI5MfCktew

Miércoles 4º Cuaresma Juan 5, 17 – 30.
Upér Jesús he’i umi judío kuérape: — Che Ru niko ndopytu’úiva hembiapópe, upévare
che ave amba’apo.
Upépe katu ipochyvéma umi judío kuéra ruvicha, ha ko’ýte ojukase hikuái Jesúspe.
Nda’ija’éi hese hikuái Jesús nombyaretéigui pytu’uha ára. Ha upéi ave, Jesús he’i
Ñandejára ituvaha.
Jesús he’i: Añetéko ha’e peẽme, che, Ñandejára ra’y ndaikatúi ajapo mba’eve che
jehegui. Che ajapo ku che ru ojapoháicha. Opa mba’e che Ru ojapóva, che ajapo avei.
Che Ru niko che rayhu, ha ha’e ohechauka chéve opa mba’e ojapóva. Ha mba’e
tuichavéva katu ohechauka vaerã chéve, ha pepytáta pende jurujái. Che ru oporomopu’ã
jeyháicha omanóva apytégui ha oporomoingove jeyháicha, péicha avei, che amoingove
jey umi che amoingovesévape. Ha che Ru nomohendái avavépe. Upéva ha’e oheja che
pópe, ikatu haguãicha opavave che momba’e, che ru oñemomba’eháicha. Upe na che
momba’éiva chéve, nomomba’éi avei che rúpe, che mbou harépe.
Añetehápe ha’e peẽme, pejapysaka porã ramo umi mba’e che ha’évare ha pejerovia
ramo pe che mbouharére, perekóta tekove opave’ỹva. Ha napeñehundi mo’ãi, pehasáma
haguére ñemanógui jeikovépe. Añete ha’e peẽme hína hi’aguĩmaha ára, ha oguãhẽma
voi katu, umi omanóva che rendu haguã chéve, Ñandejára Ra’y ñe’ẽ. Ha umi che
rendúva oikovéta. Che Ru ijehegui oikove háicha, ome’ẽ chéve aikovévo che jehegui.
Ha che pópe avei oheja amohenda haguã opa mba’e, chégui hína Ñandejára ra’y. Ani
peñemondýi ko’ã mba’e ha’évare peẽme. Oguãhẽ vaerã ágã ára opa omanóva ohendúvo
che ñe’ẽ, ha opu’ãmbáne hikuái umi oñeñotỹhágui. Umi hembiapo porã vaekue, opu’ã
jeýta oikove haguã opa ára guarã. Umi hembiapo vai vaekue katu, opu’ãne oñehundi
haguã.”
Che ndaikatúi ajapo mba’eve che jehegui reínte. Che aporomohenda che ru he’iháicha
chéve. Ha hekopete ajapo. Ndajapóigui pe che aipotaháicha, che ru che mbou vaekue
oipotaháichante ajapo.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ñande ru ha ñande sy ñanembo’e heta mba’e. Ndaha’éi voi oñemoñe’ẽ rupi
ñandévente. Hetave mba’e jaikuaa chugui kuéra jahechágui hembiapo, ha pevaite avei
ñande jajapo. Jesús oma’ẽ mba’épa Túva Ñandejára ojapo ha upéva ha’e ojapo avei.
Ndaha’éi ijeheguínte oikóva ha ojapóva ha’e ojaposéva, térã antóho oúva iñakãmente
ojapóva. Peteĩ ta’ýra térã tajýra iñe’ẽrendúva itúva ha isýpeicha, péicha Jesús
iñe’ẽrendu ha ojapo pe itúva ohechaukáva chupe ojapo haguã.
Ñande Ru Tupã omba’apo hína ñande rekovépe. Ha tekotevẽ jahechakuaa
mba’épa oime ojapo hína, ha mba’épa ojerure ñandéve ñamba’apo haguã hendive.
Mba’épa nde che reindy ha nde che irũ rehecha hína Ñandejára ojapoha nde rekovépe.
Mba’épa oñanduka ndéve ikatuha rejapo emoirũ ha embohape haguã pe Ñandejára
ojaposéva hína nendive.

Pa’i Alberto Luna.