Ñahendu Jesús Ñe’ẽ. Jueves IV de Cuaresma

Escucha el evangelio y la reflexión en: https://youtu.be/nHlNEaKU2aE?feature=shared

Jueves 4º Cuaresma

Juan 5, 31 – 47

Upéro Jesús he’i umi judíokuérape: Che añe’ẽrõ che jehe, upe che ha’éva che jehe na’iporãi mba’everã. Oĩ katu ambue oñe’ẽva che rehehápe. Ha aikuaa añeteha upe ha’e he’íva che rehe. Peẽ peporandu ramo guare Juánpe che rehe, ha’e añeteguánte he’i va’ekue che rehe.

Naikotevẽi jepe niko che avave he’i che rehe mba’eve. Ha’énte peẽme ko’ã mba’e ikatu haguã Ñandejára pende salva. Juan va’ekue niko ku lampĩu ohesapéva, ha peẽ pevy’a sapy’a va’ekue hesapépe. Che katu niko areko peteĩ oñe’ẽ porãvéva che rehe Juángui.

Upe che ajapóva niko hína, pe che ru ome’ẽ vaekue chéve ajapo haguã. Ha upéva ohechauka che ru che mbou hague. Ha che ru voi, che mbouhare, upe oñe’ẽva che rehehápe. Peẽ niko araka’eve napehendúiva chupe, térã ndapehechái chupe. Ha upéi ave, napeñongatúi iñe’ẽ pende pype, ha upévare ndapejeroviái che Ru ombou va’ekue rehe.

Peẽ niko peiko peñemo’arandu Ñandejára Ñe’ẽme, peimo’ãgui upépe pejuhutaha tekove opave’ỹva. Ha jepe upépe oñe’ẽ che rehe, peẽ ndapejuséi che rendápe peikove haguã.

Chéve mba’evete hína oĩ ramo che guerohorýva. Ha upéi ave, aikuaa porã ndapehayhuiha Ñandejárape. Che niko aju che ru rérape, ha peẽ ndapeikuaaséi chehegui mba’eve. Oime ramo oúva ijehegui reínte katu, upévape pemoguãhẽne.

Peẽ pevy’a pende rapicha pene momba’e ramo, ha ndapehekái Tupã pene momba’e.
Mba’éicha piko péicha ramo pejeroviáta che rehe. Ani peimo’ã che pomoĩ vaitaha che Ru renondépe. Upe pene moĩ vaítava niko Moisés voi hína, upe peẽ pejeroviaha.

Perovia rire umi mba’e Moisés omoĩ vaekue kuatiáre, pejerovia vaerã mo’ã che rehe.
Che rehe niko Moisés imandu’a vaekue. Ha ndaperoviái ramo upe ha’e omoĩ vaekue
kuatiáre, piko mba’éicha peroviáta umi mba’e che ha’éva peẽme.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Pe kuimba’e térã kuña katupyry ojekuaa hembiapo rupive, natekotevẽi oñe’ẽ ha’e ijehe, omombe’u ivaleha. Ñe’ẽ ha discúrsope heta mba’e ikatu ja’e jajapoha térã jajapotaha. Pe discurso iporãvéva hina umi mba’e porã jajapóva, ñanderapykuere opytáva.

Hesu he’i umi judío kuérape oma’ẽ haguã hembiapóre. Umi mba’e porã ojapóva ohechaukaha Ñandejára ombou hague chupe ha oĩha hendive.

San Ignacio he’i ñandéve che irũ ha che reindy ñañeporandu va’erãha, mba’épa ajapo kuri, mba’e ajapo aína ko’ãga, ha mba’épa ajapo va’erã Ñandejára Hesukrísto rayhupápe. Ha ombojoapy San Ignacio: pe mborayhu niko ojechauka va’erã tembiapo rupive ha ndopyta va’erãi ñe’ẽmente.

Pa’i Alberto Luna.