Ñahendu Jesús Ñe’ẽ. Domingo V de Cuaresma

Escucha el evangelio y la reflexión en: https://youtu.be/y0bKiu4CPWk

Domingo 5º Cuaresma Juan 8, 1 – 11

Upérõ Jesús osẽ oho Monte Olívospe. Ko’ẽmbávo, oho Tupaópe ha heta oĩ umi oñembojáva hendápe. Upémarõ oguapy ha oñepyrũ ombo’e chupekuéra.

Upe jave umi Moisés léi ombo’éva ha fariséokuéra ogueraha hendápe peteĩ kuña ojejuhu va’ekue omyakãratĩrõ iménape. Omoñembo’y hikuái imbytépe kuéra, ha he’i Jesúspe: — Mbo’ehára, ko kuña niko ojejuhu omyakãratĩha iménape. Moisés léipe niko he’i ãichagua kuña oñembo’ita vaerãha omano meve. Ndéiko mba’e ere.

Péicha niko ou oporandu hikuái Jesúspe ombopakova pireségui chupe hikuái. Ha upéi omoĩ vai haguã chupe poguasu kuéra renondépe. Jesús katu ojayvy ha ikuãme oñepyrũ ohai pe yvýre. Ha oporandu jey-jeýre chupe hikuái, oñakã rapu’ã ha he’i chupekuéra:— Oime ramo pende apytépe ipecado’ỹva hína, upéva raẽve tojapi chupe itápe.

Upéi katu ojayvy ha oñepyrũ jey voi ohai pe yvýre. Ohendúvo hikuái upe Jesús he’i va’ekue, peteĩ-teĩ oñepyrũ ohopa hikuái, umi itujavéva tenondete. Jesús opyta ha’eño pe kuña ndive, ha oñakã rapu’ã oporandu chupe: — Moõiko ohopa hikuái che áma.

Ndaipóri véima piko nde jukaséva.

Pe kuña he’i chupe: — Nahániri karai.

Jesús he’i chupe upémarõ: — Che ave ndaipotái remano. Tereho, ha anivéma péicha rejapo.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Hyeguasúramo kuña ha la túva oñembotavy, péa peichante va’erã voi he’i lo mitã, “kuimba’ére ndojái mba’eve”. Ha péicha kuimba’e kuérape ojeheja ojapo ojaposéva kuñáre, hendape’ỹva jepe, hese ndojái haguére mba’eve gua’u.

Jesús renondépe ojereru peteĩ kuña ojepilláva omyakã ratĩhápe iménape. Kuñánte ojereru, ndojeguerúi pe kuimba’e oporomoakãratĩva hendive. Pepe jahecháma noñombojojaiha hembiapo vaíva. Kuña apérente ojeity mokõive rembiapo vaikue.

Jesús opilla pe léi ho’ataha pe kuña ikangyvéva apérente, ha he’i kuimba’ekuérape: nahembiapo vaíriva pende apytépe tojapi itápe ko kuñáme. Upépe lo mitã ojechakuaa, oñakãity joa ha ogue upégui.

Oime gueteri che reindy ha nde che irũ léikuéra ombotapykuéva kuña derecho. Heta hendápe kuña nguéra ndojeapói mba’éramo. Ha’ete ku Ñandejára ndoipotáiva upéicha ojerereko kuñanguéra. Jesús oipota ñañombojoja kuña ha kuimba’e.

ÑAÑEMBO’E OÑONDIVE

Ñandejára ore Ru, ejapóva kuña ha kuimba’e nde joguaha, nde rajy ha nde ra’y. Orepytyvõmíkena ñande Iglésiape roñombojojave haguã nde reipota háicha. Amén

Pa’i Alberto Luna.

Che aguyjevete mante opavave ohendúva Jesús ñe’ẽ ha ombohasa jeýva hapichápe. Pene pytyvõ rupi mombyryve ha hetaitevépe roguahẽ.