Ñahendu Hesu Ñe’ê. Miércoles Santo

Escucha el evangelio y la reflexión en: https://youtu.be/lrG8KHGJH88

Miércoles Santo

Mateo 26, 14 – 25.

Judas Iscariote niko peteĩ umi Jesús 12 disípulo apytepegua. Oho ha’e umi pa’i kuéra
rendápe, ha oporandu chupekuéra: — Mboýiko peme’ẽta chéve poipytyvõ ramo
peapresa haguã Jesúspe.

Ha ha’e kuéra ome’ẽ chupe 30 níkel pláta. Upe guive, Judas oheka oikóvo
mba’éichapa oitýta Jesúspe ipópekuéra.

Páskua arete ñepyrũha árape, Jesús disípulo kuéra ou hendápe ha oporandu chupe:
— Moõiko reipota rombosako’i ndéve Páskua rembyarete haguã ko pyharépe.

Jesús he’i chupe kuéra: — Tapeho ma’érã rógape, ha peje chupe, “Ore maéstro niko
he’ika ndéve kóicha, “Che ára niko oguãhẽmbotáma. Che disípulo kuéra ndive ahasase
nde rógape Páskua arete.”

Ha idisípulo kuéra oho ojapo Jesús he’i haguéicha chupe kuéra, ha ombosako’i hikuái
upépe Páskua ombyarete haguã.

Ha pyhare oguãhẽvo, Jesús oñemohenda mesápe umi 12 disípulokuéra ndive. Ha
ho’u aja hikuái hembi’u, Jesús he’i chupekuéra: — Añete ha’e peẽme, oĩ peteĩ pende
apytépe che moñuhãtava hína.

Upéva tuicha oguapy hesekuéra, ha oñepyrũ oporandu chupe: — Maéstro, che nga’úta
piko hína.

Jesús he’i chupe kuéra: — Pe ipan pehẽngue omohe’õva pe pláto che akaruhágui,
upévata hína. Che niko amano vaerã voínte, Ñandejára Ñe’ẽme he’iháicha. Aichejáranga
pe ojeréva che rehe. Tojererekóke. Iporãve vaerã mo’ã chupe ohecha’ỹ rire ára resa.
Upépe oñe’ẽ Judas, pe oitýtava chupe hína, ha he’i: — Maéstro, che nga’u piko hína.
Jesús he’i chupe: — Ndéma niko ere.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Jaikuaa niko, jahecha ha ñahendu heta mba’e vai ojejapóva ha oikóva ñande apytépe ndo’áiva Hesúre ojeroviáva. Ñande Iglésiape jepe jaikuaa ha ñahendu oikoha tembiapo ky’a, oiko’ỹ vaerã oñemombe’u téle, radio ha diáriope, ohypýiva pa’i ha obíspope.

Umíva ñanemondýi ha sa’i ramo jepe umi ho’áva umi tembiapo vaípe, oñembojapáma opavavére, ha umi ndaija’éiva voi Iglesia, Papa, obispo ha pa’íre, oĩ jave ojavýva ojeitýma okopi opavavére ha ojatapy ñande Iglesia apére.

Jahecha Hesu irũ peteĩ, Judas, ohoha ojerure pláta Hesu akãre, ome’ẽ haguã chupe umi ojukaséva pópe. Iñepyrũmby guive voi pe aña oike raka’e umi Hesu irũnguéra apytépe. Hesu oikuaa porã upéva ha oñandu ipirépe. Opáichavo ha’e ndoguevíri upe haguére, ombyaty ha oñemoñe’ẽ chupe kuéra, oñembo’e hendive ha hese kuéra ha ome’ẽ hekove ipahápe hesekuéra.

Nemokangýpa ndéve che irũ ha che reindy, nemboguevisépa avei sapy’ánte ehecha ramo aña omoingeha huguái ñande Iglésiape avei. Mba’épa reñandu.

Pa’i Alberto Luna.