Ñahendu Hesu Ñe’ê. Sábado V Cuaresma

Escucha el evangelio y la reflexión en: https://youtu.be/Wu5uM3iNN8Y

Sábado V Cuaresma Juan 11, 45 – 57.

Uperö heta umi oúva María andúvo, ha ohechávo hikuái pe milágro Jesús ojapóva,
Lázarope omoingove jevývo, ou ojerovia hese. Oĩ katu ohóva fariséo kuéra rendápe ha
omombe’úva chupekuéra mba’épa ojehu. Upe rire, umi fariséo ha pa’i ruvichakuéra
oñembyaty umi poguasu kuéra ndive, ha he’i hikuái: — Mba’éiko jajapóta. Ko kuimba’e
niko heta milágro ojapo oikóvo. Ndajajokói ramo, opavave ojeroviáta hese. Upéi oúne
ágã ñandéve umi Rromagua, ohundi ñande tupao ha ñane retã.

Peteĩva hérava Caifás, pa’i guasúrõ ojupi va’ekue upéva pe áñope, he’i: — Ajépako
pende výro. Ndapehecha kuaái piko iporãvetaha ñandéve peteĩnte omano ramo
opavavére, ñane retã oñehundi rangue ñandehegui.

Caifás niko nde’íri péicha he’iségui reínte. Ojupi guive voi pa’i guasúrõ pe áñope, he’i
voi oúvo Jesús omanotanteha voi judío kuérare. Jesús jepe niko nomano mo’ãi vaekue
judío kuérapente osalva haguã. Nahániri. Ombyatypa haguã uvei opa umi Ñandejára
mba’éva isarambíva yvy tuichakuére. Upéva pe árape voi umi judío ruvicha kuéra
oñemoĩ peteĩ ñe’ẽme ojuka haguã Jesúspe.

Upe guive Jesús ndoiko véima judíokuéra apyte rupi, ani haguã avave ohecha chupe.
Osẽ oho peteĩ puéblo’i hérava Efraímpe, opytáva pe desiérto rembe’ýpe. Upépe opyta
oiko idisípulokuéra ndive.

Hi’aguĩma ramo ohóvo Páskua arete, opa guio oĩ heta hénte ohóva Jerusalénpe
oñembosako’i haguã pe areterã. Ha oheka joa hikuái Jesúspe. Tupaópe katu oporandu
hikuái: — Ou mba’énepa ko Páskua areterã térãpa nahániri.

Umi fariséo ha pa’i ruvicha kuéra katu oapresaségui Jesúspe, he’ika oime ramo
ohecháva chupe, oikuaauka haguã chupekuéra.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ndajaipotái niko oñeñe’ẽ vai ñande rehe, ndajaipotái ñande réra, ñande familia herakuã vai térã katu oñemongy’a. Hesu omoingove jevy rire Lázarope oime heta ojeroviáva hese upévare, umi judío ruvicha kuéra katu oñemoĩ peteĩ ñe’ẽme ojuka haguã Hesúpe, oñepyrũ oñe’ẽ ha omoĩ vai chupe opavave renondépe ha omoñuhã oity haguã chupe ipópekuéra.

Hesu ndojapóiramo jepe ivaíva, oñembojoja umi hembiapo vaíva rehe, ha oiko okañy ha’e avei mburuvicha kuéragui. Umi ndojeroviáiva hese omboguese héra ha iñe’ẽ ko yvy apégui, ha umi ojeroviáva hese oguata hendive, omoirũ chupe, ohasa asy hendive avei kañymbýpe.

Ha péichako oiko che reindy ha nde che irũ. Upe oikóva Hesu rapére ha oñeha’ãva omopotĩ hape, ojuhúne avei Hesu ojuhu haguéicha, aña ra’ykuéra ipochy ha ohenonde’áva ichupe, ohape jokoséva upe Ñandejára rembiapo. Iporã ñamoirũ Hesúpe ko Semana Sánta pe, ha’e ñanembo’e hína mba’éichapa jaguata vaerã Ñandejára rapére opu’ã ramo jepe heta moñái ñande pe’aséva ijykégui.

Pa’i Alberto Luna.