Ñahendu Hesu Ñe’ê. Viernes V Cuaresma

Escucha el evangelio y la reflexión en: https://youtu.be/tEmeWjpbNdQ

Viernes V Cuaresma Juan 10, 31 – 42.

Upérõ, umi judíokuéra ipojái jeýma itáre, ojapi haguãicha chupe. Jesús katu he’i chupekuéra: — Che ru po rupi niko heta mba’e iporãva ajapo pende rovake. Mavaitévare piko che jukase.

Umi judíokuéra he’i chupe: — Ndorojuka mo’ãi niko iporãva rejapo haguére. Remanóta ejahéi haguére Ñandejárare. Yvypórante niko nde, ha reikose Ñandejára ramo.

Jesús he’i chupekuéra: — Pende léipe niko he’i Ñandejára he’i hague: “Peẽ niko tupã”.

Jaikuaa niko pe Ñandejára Ñe’ẽme he’íva ndaikatuiha ñamboyke. Ha upépe Ñandejára he’i umi iñe’ẽ ha’e ome’ẽ va’ekuépe tupãha. Ñandejára niko che mboyke va’ekue imba’erã ha che mbou yvy ári. Mba’éicha piko aipóramo pejéta ajahéi hague hese, ha’e haguére che Ñandejára ra’yha. Ndajapói ramo umi mba’e che ru ojapóva, ani che rerovia. Ajapo ramo umi mba’e ha’e ojapóva katu, nda che reroviái ramo jepe, perovia umi mba’e ajapóva.

Péicharõ peikuaa porãta che ru ha che peteĩnteha.

Upépe, oapresase mo’ã jeýma chupe hikuái. Jesús katu okañy chuguikuéra.
Upéi katu Jesús ohasa jey Jordán mboypýri, ku Juan oporomongarai haguépe.

Upépe oĩ aja, heta oĩ oúva hendápe, ha upéi he’íva: — Juan ndojapóirõ jepe milágro, añeteguánte he’i va’ekue oñe’ẽ ramo guáre Jesús rehe.

Ha heta umi upepegua ojerovia Jesús rehe.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Sapy’ánte oime upérupi ñande rapicha he’íva ojapotaha peteĩ mba’e ha upéi
ndojapói. Umívare ñande ja’e iñe’ẽ reiha. “Upéva ningo peteĩ ñe’ẽ rei, ijuru kuágui reínte oñe’ẽva”, he’i lo mitã. Péva he’ise hembiapo ombojapuha iñe’ẽ. He’i ningo San Juan: Ani japorohayhu ñane ñe’ẽmente, tembiapo hina upe ohechaukáva mborayhu añete.

Umi hudio kuéra ojukase Hesúpe, ha’e he’ígui Tupã ra’yha. “Peteĩ kuimba’énte
ningo nde, ha piko eréta oréve nde ha’eha Tupã?” He’i ichupe hikuái. Hesu katu
ombohovái ichupekuéra Ñandejára ñe’ẽ rupive. Upe he’ihápe opavavéva ha’eha tupãicha, ñande ha’e rupi Tupã ra’y ha Tupã joguaha. Hesu he’i avei Túva Ñandejára oiporavo ha ombou hague ichupe ko yvy ári, ha’égui Ñandejára itúvaicha. Ha’e kuéra ndojeroviáiete voi iñe’ẽ rehe.

Ombojapu ichupe hikuái, ndoikuaaséi mba’eve ha ipochyvéntema katu Hesu ndive, upéicha he’i haguére. Ojeapo hague rehe Tupãicha ohundise ichupe hikuái.

Upépe Hesu he’i ichupe kuéra ndogueroviái ramo iñe’ẽ tohecha hembiapokue, upe ha’e ojapóva omoañete rupi iñe’ẽ ha ohechauka ha’eha Tupã ra’y. Ha ndépa che irũ ha nde che reindy, mba’épe ehecha nde rekovépe ha ne rembiapópe nde ha’eha Ñandejára ra’y ha tajýra. Mba’épa pe ha’e ome’ẽva ndéve ehechauka haguã nde ha’eha Ñandejára ra’y, Ñandejára rajy.

Pa’i Alberto Luna.