Ñahendu Hesu Ñe’ê. Jueves V Cuaresma

Escucha el evangelio y la reflexión en: https://youtu.be/RRTN6RAzPH0

Jueves V Cuaresma Juan 8, 51 – 59.

Upérõ Jesús he’i: Añetéko ha’e peẽme, pe ojapóva umi mba’e che ha’éva nomano mo’ãi araka’eve.

Umi judíokuéra he’i chupe: — Ko’ágã katu roikuaa porã erekoha demóño nde pype.

Abraham ha opaite umi proféta niko omanomba vaekue, ha piko reju ere oréve: “Pe ojapóva che ha’éva nomano mo’ãi.” Nde nga’u piko nde tuichave ore ypykue Abrahámgui?.

Ha’e niko ymáma omano ha umi proféta péichante avei. Máva piko nde.

Jesús he’i chupekuéra: — Chete voi añe’ẽ porã ramo che jehe, upéva ndovaléi mba’everã. Upe che moĩ porãva katu niko che ru, upe peẽ pejéva ha’eha peẽme Tupã. Ha peẽ ndapeikuaái chupe. Che katu aikuaa chupe, ha ha’érõ ndaikuaaiha chupe, peẽicha avei che japúta.

Añetéko ha’e peẽme che aikuaaha chupe, ha ajapoha pe ha’e he’íva. Pende ypykue Abraham niko ovy’a va’ekue ohecháta haguére che ajuha ára. Ha ohecha va’ekue ha’e, ha tuicha ovy’a.

Umi judíokuéra he’i Jesúspe: — Ne’ĩra niko remboty 50 áño, ha piko ere oréve rehecha hague Abrahámpe.

Jesús he’i chupekuéra: — Añetéko ha’e hína peẽme, che aikove Abraham oikove mboyve guive.

Upépe ipojái joa hikuái itáre ojapi haguã Jesúspe. Ha’e katu okañy chugui kuéra ha osẽ tupaógui.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oime niko he’íva: “Ñane resãi guive ñande retépe, opa mba’éma iporãmba”, ha oime katu he’íva: “ko yvy ári ja’úva ha jarekóvante la ovaléva, uperiregua ndajaikuaái”.

Ha upéicha heta ñande rapicha oime hi’ãhóva ha ojesarekóva ombyaty haguã heta mba’e ko yvy ári, oheka vy’a ikatu aja ojuhu, oisyryku pe hekovemi ohupyty peve ichupe noiméi ramo guáicha tekove uperiregua, noha’arõi voi mba’eve iporãva omano rire.

Hesu katu he’i: “pe ojapóva che ha’éva nomano mo’ãi araka’eve”. Upéicha oikuaauka ñandéve ñande rekove ndaha’éiha ko yvy ári guarãnte, oñembojoapyha ñandéve tekove opave’ỹva, oñepyrũva ko’ãga ha oñemohu’ãva Ñandejára ykére ñamano rire.

Upéva pe tekove añete, pe tekove opave’ỹva ha’e hina Tupã remime’ẽ, oñepyrũ hína ko’ãga ha upéi oñemosã yvágape. Hesu he’i ha’e orekoha upéva, oikuaa rupi Tupãme ha ou rupi ichugui. Ha Hesu ome’ẽse ñandéve avei pe tekove añete Ñandejáragui oúva.

Ha mba’etekópa che irũ ha nde che reindy, ñaime hína pe jeroviápe ñande rekove uperiregua rehe. Oimépa opávo ñande hegui ko ñande rekovemi jague ñande avei ha japaite, térapã eha’arõ nde rekove ko’ãgagua oñemosã uperire tekove pyahu ndive. Ñandejára ykére.

Pa’i Alberto Luna.