Ñahendu Hesu Ñe’ê. Miércoles V de Pascua

Escucha el evangelio y la reflexión en: https://youtu.be/nUWYhFAZU-g

MIÉRCOLES V DE PASCUA

San Juan 15, 1-8

Jesús oñandúvo oguãhẽmaha ára ha’e ohejávo ko yvy oho haguã túva rendápe, he’i idisípulokuérape: Che niko ku parral máta ha’etéva, che ru katu iñangarekohára. Umi che rakã hi’a’ỹva ha’e oikytĩ. Hi’a ramo katu omopotĩ hi’ave haguã. Peẽ niko pene potĩmbáma
umi mba’e ha’e vaekue peẽme rupi.

Pejoaju che rehe, che ajoajuháicha pende rehe. Yvyra rakã niko ndahi’ái ha’eño rei, ndojoajúi ramo imátare. Péicha avei peẽ, ndaikatu mo’ãi pejapo mba’eve ndapejoajúi ramo che rehe.

Che niko pe parral máta, peẽ katu umi hakã. Pe ojoajúva che rehe ha che hese, upéva heta hi’áne. Che rehe’ỹ katu, peẽ ndaikatúi mo’ãi pejapo mba’eve. Pe ndojoajúiva che rehe oñemombóta umi yvyra rakã pirukuéicha oñembyatýva ojehapy haguã.

Peẽ pejoaju ramo che rehe ha napemboykéi ramo che ñe’ẽ, pejerure pejerureséva ha oñeme’ẽne peẽme. Péicha ojehecháta che Ru tuichaha, peẽ pejapo ramo mba’e iporãva ha peiko ramo che disípulo teéicha.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Imba’e porãvape Ñandejára ohovasa vaerã ha oraháne yvágape, ha umi iñañávape katu okastiga vaerã ha omombóne tata rendýpe. Upéicha niko oje’éva ñandéve ñane mitãme ani haguã jajapo ivaíva, jakyhyje haguã Ñandejára ñanenupã ramo guarã.

Ha heta oime ohecha ramóva umi ñande rapicha imba’e porãva, oñembo’eva ha ohóva tupaópe ohasa asýramo. Ha he’i hikuái: Mba’éicha piko Ñandejára oheja umi ojeroviáva hese ha oguatáva hendive ohasa asyete, oiméne piko hesarái chuguikuéra, térã piko oiméne hembiapo vai kañy hápe mba’e, ajéve péicha Ñandejára okastiga ichupekuéra.

Hesu he’i opavave ñande ha’eha hina umi parral rakãicha ojoajúva hese, ha ha’e katu hína pe parral máta, ha Túva Ñandejára upe oñangarekóva pe parral máta rehe ha hakãnguéra rehe. Oiméramo ndo joaju porãiva Hesúre, upéva ndahi’ái, Ñandejára oikytĩ, omombo, ipiru ha ojehapy upéi, ha oiméramo ojoaju porã ha hi’áva katu oikytĩnte avei, opoda hi’a porãve haguã.

Mokõivéva oñekytĩ ha ojepoda, upe hi’áva ha upe ndahi’áiva, mokõivéva huguy syry ha hesay oñekytĩvo, opyta ombyasy umi hakã ojepe’áva ichugui. Upe ojoajúva Hesúre katu ohasa asýramo jepe ndaipy’a tarovái, oikuaa pype Tupã ndoheja rei mo’ãiha ichupe, ha omoĩnte Ñandejára pópe ijehasa asy, ha’e oiméne omohendataha hína opa mba’e iporãve haguãicha ha uperirénte ojehecháne jehasa asy jepe hi’a porã jajoajúramo Hesúre.

Reñandúmapa che reindy ha nde che irũ ojetrosáramo nde hegui ne rakã. Rerrenega ha nde pochýpa Ñandejára ndive upéicha jave. Oimépa rehecháma nde rekovépe umi nde jehasa asy rupive ou hague ndéve jehovasa ha oñeme’ẽ hague ndéve iporãvéva.

Pa’i Alberto Luna.