Ñahendu Hesu Ñe’ê. Sábado V de Pascua

Escucha el evangelio y la reflexión en: https://youtu.be/i8dPHjpOzDI

SABADO V PASCUA                                                              

      San Juan 15, 18-21

Jesús oñandúvo oguãhẽmaha ára ha’e ohejávo ko yvy oho haguã túva rendápe, he’i idisípulo kuérape:  Oime ramo nda’ija’éiva pende rehe, pene mandu’áke che rehe raẽ nda’ija’éi hague hikuái.  Peẽ heseguakuéra mba’e rire, ha’e kuéra pende rayhu vaerã mo’ã. Peẽ niko ndaha’e véima ha’ekuéraicha.

Che poiporavo va’ekue peẽme hénte kuéra apytégui, ha upévare ha’e kuéra nda’ija’éi pende rehe.  Pene mandu’áke ko ha’e vaekuére peẽme. Tembiguái ndikatúi tuichavévo ijáragui.

Che rehe oko’i ramo hikuái, oko’íta avei pende rehe, ha che rehe opena ramo, openáta avei pende rehe.  Opa ko’ã mba’e ojehúta peẽme che disípulo haguére peẽ, ha ndoikuaáigui hikuái upe che mbouharépe.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

            “Pe karai ojehayhu hina”, ñahendu oje’e, térã katu “pe kuñakarai ojehayhu”. Upéva he’ise hina heta oimeha oĩva hendive, ojeroviáva hese ha omoirũtava tembiapo ha’e omyakãva. Ha ñahendu avei oje’e “avave ndoikuaaséi pe karaígui mba’éve”, térã katu “pe kuñakarai naisántói avavépe”, aipóramo katu heta oime ndaija’éiva pe tapicháre ha nopenamo’ãiva hese, ombovai ha ombyaítava uvei ha’e ojapo ha he’íva guive.

            Ñande niko jaipota ñande rapicha kuéra ñande rayhu, jaiko porãse niko opavave ndive, ndaikatúinteko ñame’ẽ gusto opavavépe. Hesu katu he’i ñandéve oimetaha katuete ndaija’éiva ñande rehe jaiko haguére hendive, jaguata haguére tupao ha komunidápe. Upéva nañanemondýi vaerãi, hese oĩ vaekue ndaija’éiva ha oiméta avei ndaija’éiva ñande rehe ñamoirũva ichupe.

He’i avei Hesu oime haguéicha ohendu ha ohayhúva ichupe oimetaha avei ñanerendúva ha ñande rayhúva ñandéve. Jaikuaa vaerã aipo ramo jarekotaha ñanerendúva ha oimetaha avei nañanerenduséiva. Opavavetépe voi ñane sánto porã ramo ha ndaipóri ramo avave ndaija’éiva ñande rehe, ikatu oime ndajajapopái hekópe Hesu ñanembo’éva, ndaja’epái ja’e vaerãva, nañambopochyséigui ha ndajaiko vaiséigui ñande rapicha ndive. 

            Jaha rei katu hese aipo ramo che reindy ha nde che irũ, ñamombe’u ñande rapichápe Ñandejára ojapóva ñande rekovépe, ñañembo’e oñondive jeroviapópe, ñamboguata tembiapo Ñandejára rérape. Oiméta katuete ñanemoirũva, ha oiméramo ombovaíva ani upévare jaguevi térã ñande pyta ryrýi. He’i háicha lo mitã, péva oĩmba voi hína lívrope.

Pa’i Alberto Luna.