Ñahendu Hesu Ñe’ê. Sábado 18 de enero

Escucha el evangelio y la reflexión en: https://youtu.be/3PB6oSDQkk0

Sábado I Tiempo Ordinario                                                           Marcos 2, 13 – 17.

Upéi Jesús oho mar rembe’ýpe. Opavave oñemboja hese ha ha’e oporombo’e. Ohasávo, ohecha Alfeo ra’y Levípe, oguapyvahína impuésto oñemono’õhápe Roma peguarã.

Jesús he’i chupe: Eju che moirũ. Leví opu’ã ha oho hendive.

Upéi Jesús okaruhína Leví rógape, ha heta umi impuésto Roma peguarã ombyatýva, ha ambue herakuã vaíva oguapy avei mesápe Jesús ha idisípulo kuéra ndive. Heta niko umi oikóva hapykuéri. Mbovymi Moisés léi mbo’eha Fariséova, ohechávo Jesús okaruha umíva ndive, oporandu idisípulo kuérape: Mba’éicha rupi piko pende maéstro oguapy okaru impuésto mbyatyha ha mba’e vai apoha ndive.

Jesús ohendu upéva ha he’i chupekuéra: Hesãiva noikotevẽi oipohanóva ichupe, hasývante. Che ndajúi ahenóivo heko jojávape, hembiapo vaívape uvei.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ñande niko jahecha mba’éichapa umi ojuehe guáva ndahasýi ojotopa ha oime oñondive, mitã ovy’a ijavegua ndive, mitãrusu ojoheka avei ha ovy’a oñondive. Aty guasúpe sapy’aitépe kuimba’e ijaty kuimba’e ndive ha kuña oheka hapicha kuña oñemongeta haguã. Umi ipláta hetáva oheka iñirũ ha’eichagua ha mboriahu katu ijaty oñondive. Umi imba’e porãva ojehe’a imba’e porãva rehe, umi maléo katu oñemosã iñirũ ha’eichaguáva rehe.

            Hesu ndive oguatáva katu ndojoporavói oñondive, ojotopántema pe aty guasúpe, ndaha’éi ha’ekuéra oñohenóiva, Hesu ohenói ha oiporavo peteĩ teĩme ha ombyaty chupe kuéra ijerekuévo oguata haguã hendive.

            Ha mávapa Hesu oiporavo iñirũrã ha oime haguã ijerekuévo. Ndaha’éi iporãva meme, ndaha’éi ijoheipyréva meme. Ko’ápe ndaikatúi ja’e “santorã santopáma”, ndaikatúi avei ja’e Ñandejára nohenoiriha umi heko vaíva ha oguata karẽvape. Péicha ningo oimo’ã umi fariséo kuéra, oikoitéva tupaóre ñembo’e ha jehovasápe, oñemondýi ha ohecha ramo Hesu ohenói haguére iñirũrã peteĩ mba’e vai apohápe, ojehe’a ha oguapy haguére okaru umi heko vaíva ndive.

            Hesu he’i umi hesãiva noikotevẽi oñepohano, ha’e ndoúi hague ombyaty umi vícho mánso ha oheka umi santopámava, ha’e ou ombyaty umi iñarõ ha iraríva, hembiapo vaívape oipohano haguã. Péva katu notísia porã ñandéve guarã hína, ajépa che irũ ha che reindy. Hesu irũ apytépe ikatu avei ñañehenói ha ñandeja ñande, ndaha’éiramo jepe pohã ro’ỹsa.

Pa’i Jasy.