Ñahendu Hesu Ñe’ê. Sábado 19 de octubre

Escucha la reflexión en : https://www.youtube.com/watch?v=LVq-hyQXmIU

Ñahendu Hesu Ñe’ê. Sábado 19 de octubre

Lucas 12, 8 – 12.

   Upérõ Jesús he’i idisípulo kuérape:   Peẽ peje ramo oimeraẽvape pejeroviaha che rehe, che amombe’úta Ñandejára ángel kuérape, peẽ che mba’eha.  Ha oimérõ he’íva nda che kuaaiha katu, che ave ha’éne Ñandejára ángel kuérape peẽ ndaha’eiha che mba’e. Che rehe peñe’ẽ vai ramo, Ñandejára oheja rei kuaáta peẽme upéva. Espíritu Santo rehe peñe’ẽ vaírõ katu, Ñandejára ndoheja rei mo’ãi peẽme upéva.

   Ág̃a pene moĩvo hikuái karai ha poguasukuéra renondépe téra karai juez rovake, ani pejepy’apy mba’épa pejéta pende jehe.  Og̃uahẽvo peẽme peñe’ẽ hag̃ua, Espíritu Santo he’íta peẽme mba’e-mba’épa peje vaerã.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

He’i ningo upérupi lo mitã umi oikoitereíva tupaópe isantulárioha. Oĩma katu ojeheróva ha oñemomarkánte “anguja tupao” térã katu “pa’i mbarakaja hamba’e”. Ha umíva ningo oje’éva ojetalla haguã, ñe’ẽ reitýpe ha pukarã ijatyhápe lo mitã upérupi, ñe’ẽ mbeguépe jahasakuévo oñehenduka. Oĩ voi katu ningo ñande rovaitépe oúva ñande rape joko haguã he’ívo: “Mba’e piko la renohẽtava upérupi reikóvo, neremboapu’ái ningo mba’eve. Mba’e ventaha piko rehupyty. Ejehejána umívagui”, hamba’e.

Ha upéva oiko jepi ñande rógape voi. Sapy’ánte katu ñamba’apo hápe, ñane vesíno kuéra, térã katu ñane hénte kuéra apytépe hamba’e. Ha umícha sapy’ánte jajúma ñatĩ ñamombe’u haguã ñande jajeroviaha Ñandejárare, jaguataha komunidápe, grupo térã movimiento tupao guápe hamba’e.

Hesu he’i idisípulo kuérape ani haguã otĩ he’i haguã ojeroviaha hese avave renondépe. Ani okyhyje ojetalláramo guarã hese kuéra ha ojeraháramo guarã mburuvicha ha juez kuéra renondépe jepe. Espíritu Santo ome’ẽta pu’aka ha omoĩta ñe’ẽ arandu ijurúpe ombohovái haguã opa umíva, he’i Hesu.

Oime ningo ñande rapicha cristiano ambue tetãgua, católiko térã evangélico ojereraháva kárselpe he’i haguére ojeroviaha Hesúre, térã katu oñemuñáva, oñembo’itáva, ojejukáva, ojehapýva itupao térã hóga kuéra Hesú réra omoherakuã haguére. Ñane retãme jepe niko, Stroessner tiémpope, heta ñande rapicha cristiano campesino ohasa asy ha ojeapresa vaekue oĩ haguére Líga Agraria Cristiánape.

Ñane kangy imi vove ñande guatápe che irũ ha che reindy, ha jakyhyje vove ja’e haguã ñande rapicha renondépe ñande ha’eha Hesu rehegua, iporã ñane mandu’a ko’ã ñande rapicháre ogueropu’akáva kurusu pohýi Ñandejára rayhupápe. Upéicha ikatúne ñande ave ñandepy’aguasu imive ñamoĩ haguã ñande rova ñati’ỹre Ñandejáragui ha ja’e haguã jajeroviaha hese oimeraẽva rovake.

Pa’i Jasy.