Ñahendu Hesu Ñe’ê. Domingo 23 de febrero

Escucha el evangelio y la reflexión en: https://youtu.be/GfdzgOsWdwE

Domingo VII Tiempo Ordinario Ciclo A. Mateo 5, 38 – 48

Upérõ Jesús he’i idisípulokuérape: Peikuaa oje’e hague: “Oĩ ramo ohesa mombúva
hapichápe, péva tojehesa mombu. Ohãi mopẽva hapichápe, péva toñehãi mopẽ.” Che katu
ha’e peẽme: “Ani pemyengovia pe ojapo vaívape pende rehe. Oĩ ramo nderova petéva,
eheja tanderova pete jovái. Oĩ ramo nde rerahaséva karai juez renondépe oipe’aségui
ndehegui nde ao, eheja togueraha nde ahoja ave. Ha oĩramo oguerojaukaséva ndéve peteĩ
mba’e pohýi una légua, eraha chupe mokõi. Oĩ ramo omba’e jeruréva ndéve, eme’ẽ chupe.
Oĩ ramo omba’e poruséva, eiporuka chupe.”

Peikuaa avei oje’eha: “Ehayhu nde rayhúvape, ha nde rayhu’ỹvape katu nahániri.”

Che katu ha’e peẽme: “Pehayhu umi pende rayhu’ỹvape, ha pene mbohasa asývape.
Peñembo’e hesekuéra. Péicharõ, pehechaukáta hína pejapoha upe pende Ru yvagapegua
oipotáva. Ha’e niko oheja kuarahy ojope iñañávape ha ipy’a porãvape. Ha’e hína pe
oguerúva ama umi hembiapo porãvape ha umi hembiapo vaívape. Pehayhúrõ pende
rayhúvape año, piko mba’éicha Ñandejára omyengoviáta peẽme pene rembiapo.

Pláta mbyatyha jepe niko péicha avei ojapo. Ha pemomaitei ha peñakãity ramo umi peikuaáva añópente, piko mba’e iporãva oĩ upévape. Umi Ñandejárare ojerovia’ỹva jepe niko péicha ojapo. Peẽ katu pende py’a porã vaerã pende Ru yvága pegua ipy’a porãháicha.”

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Ñahendu niko oje’e upérupi: Mba’érepa Ñandejára oheja hetaite aña oiko yvy apére.
Mba’ére piko nohundipái umi iñañávape jaiko haguã py’aguapýpe. Ha oiméramo tapicha
iñaña ha hembiapo vaíva katu ñahendu oje’e: Pévape tekotevẽ ñaipohano mbaretépe,
jaikuaauka ichupe anive haguã ojapo ivaíva.

Hesu katu he’i Tupã ohayhuha opavavépe, ndoipotái avave oñehundi, ha opavavépe guarã ombou ára ko’ẽ, ama, kuarahy, yvytu. Pe mborayhu Tupã oñandúva ndaha’éi umi imba’e porãva peguarãnte. Ha’e ohayhu opavave ita’ýra ha itajýrakuérape, imba’e porã ha iñañávape. Ha’e niko túvaicha hakate’ỹ opavavére ha opavavépe ome’ẽ imborayhu.

Ha he’i Hesu ñande jaiko vaerãha ñande ru yvágape guáicha avei. Ñane mba’e porã va’erã iñañáva ndive, ñañembo’e vaerã ñane kontrário rehe, ñamyengovia vaerãha aña mborayhúpe. Ñande pu’aka va’erã aña ratáre, ojepota rangue ñande py’ape pochy ñambohasa py’aguapy.

Ndaha’éi hina ñane añave ha ñande pochyvégui ñande pu’akáta añáre. Hesu he’i mborayhu ha mba’e porãme mante ñaipohano ha ñamonguerataha aña rapykuere ñande pype ha ñande rapichápe oĩva.

Ikatúnepa, che reindy ha nde che irũ, pe Hesu mborayhúicha ñane mborayhu tuicha avei, ikatúnepa ohupyty opavavépe, ija haguãicha ñande py’ápe opavave ñande rapicha, imba’e porã ha iñañáva. Opavavépe ñamoguahẽ haguãicha mba’e porã. Upéicha oikóta ñande hegui Tupã ra’y ha Tupã rajy añete.

Pa’i Alberto Luna.