Ñahendu Hesu Ñe’ê. Viernes 21 de febrero

Escucha el evangelio y la reflexión en: https://youtu.be/-5rRBmiVcA4

Viernes VI Tiempo Ordinario Marcos 8, 34 – 9, 1

Upe jave Jesús ohenói idisípulokuérape, ha opa umi oĩva ijerére, ha he’i chupekuéra:

— Peẽ che moirũsérõ, peñembyesarái umi mba’e peẽ pejaposévagui. Pehupi pende kurusu
pende apére, ha peju che moirũ. Pe hekovére hakate’ỹva, omanóta. Pe omanóva che
rehehápe ha evanhélio rehehápe katu, ojesalváta. Mba’eve niko nañanohẽi jarekopárõ opa
mba’e, ha ipahápe ñañehundi. Ñande rekove niko ndaikatúi jajogua.

Ani petĩ che hegui térã umi mba’e che ha’évagui ko’ã tekove jerovia’ỹ ha mba’e vai apoha renondépe. Cháke péicha pejapórõ, che avei atĩne pende hegui ágã aju vove che Ru mimbipa reheve hi’ángel kuéra ndive. Añete ha’e peẽme, pende apytépe oĩ hína ko’ápe nomano mo’ãiva ohecha mboyve Ñandejára Réino.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

San Francisco Javier ha San Ignacio de Loyola ndaje raka’e oikómiva oñondive pensiónpe, ostudia hikuái facultápe, Paríspe. Ha la Francisco Javier upérõ ipyahu, iñakãhatã ha imba’e pota voi raka’e. Oñembotuichase, ivale voi ningo ha’e, campeón de atletismo, oimo’ã voi ojagarráta la múndo ipéchore ha’e.

Ha Ignacio oipurúvo Hesu ñe’ẽ he’ímiva ichupe oikóvo: “Mba’épa ovaléta ndéve Francisco reganambáramo la múndo ha reñehundi nde upe jave”. Ha ndogustái mitã Francíscope upe ñe’ẽ. Irari voi la Ignáciogui, oiko ha’e hekópe, ndaijokohái.

Upéinte mbeguekatúpe oguapy ohóvo hese umi ñe’ẽ ha ou avei upéi Francisco ojejopy ha oikotevẽ jave, iñirũ Ignacio ombohasa chupe ipo. Upéva tuicha oguapy hese ha upe guive Ñandejára ohesape’a ha omombáy chupe ha ombojere ipy gotyo hekove. Ha umi mba’e pota múndo rehegua oñandu vaekue, oñepyrũ omoĩ Hesukrísto rérape, ha pe ñemomba’e guasu ha tuicha mba’e oikoséva omoĩ upe guive Ñandejára rapére.

Ha ou oiko chugui peteĩ misionero py’aguasu, ha ojagarra añete la múndo ipéchore Ñandejára rérape. Oho Áfricape, upéi Índiape opyta puku, ohasa Japónpe ha uperire ohove
oguahẽ meve China rokẽme opyta. Ha oiko hese he’i háicha Hesu, nombyasýigui hekove,
nahakate’ỹigui ijehe, oikove ha oheja hapykuere oparupiete. Ogana Ñandejára peguarã heta
hapichápe, oipyguara la múndo tuicha háicha ha ombyaty Hesukrísto korápe opaichagua
ovecha.

Ha péicha hína chamigo ha che reindy. Ñamoĩmbaite ramo ñande rekovemi Ñandejára pópe, ha ñaime ramo ichupe ojevale haguãicha ñande rehe, taijetu’u jepe ra’e, heta mba’e porã ñande rapicha kuéra peguarã ha’e ikatu ojapo ñande rehe ae.

Pa’i Alberto Luna.