Ñahendu Hesu Ñe’ê. Viernes 22 de Noviembre

Escucha la reflexión en:     https://youtu.be/SInMx2zJdqU

Lucas 19, 45 – 48.

Upérõ Jesús og̃uahẽvo Jerusalénpe, oho Tupaópe ha oñepyrũ omosẽmba upégui umi oñemúvape. He’i chupekuéra: — Ñandejára Ñe’ẽme niko he’i, “Che róga niko, ñembo’eha róga”. Peẽ katu pejapo chugui mondaha kuára.

Ára ko’ẽre niko Jesús ohóva voínte tupaópe ombo’e hag̃ua. Umi pa’i ruvicha, Moisés léi ombo’éva ha myakãhára kuéra katu, oheka mba’éichapa ikatúta ojuka chupe. Ha mba’evéicharõ nda’ijái chupe kuéra. Opavavénte oheduseve-seve ha ijurujái umi mba’e Jesús he’ívare.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

                Ñande pochýramo niko ñande ruguy raku, jasapukái ha jajetyvyro, ñamopu’ã ñande jyva, jaja’o hatã, ñañe’ẽ pohýi ha ñama’ẽ vai umi ñanembopochývare, oñandu haguã avei ivaiha upe ojapóva ñande rehe. Ha upe pochy piko ndaivaíri. Ikatu ñaporandu. Ikatu niko ivai ha ñanembyai ñandéve ha ñande rapichápe, ha ikatu avei iporã ha tekotevẽ. Ha mba’éichata upea. Ha ndaikatúi niko jaguerovy’a, jaguerohory ha jajepopete hendape’ỹ ha ivaíva ojejapóramo ñande rehe térã ñande rapicháre ñande rovake. Umíva niko ñanembopochy. Ha upe pochy ohechakuaáva hendape’ỹva ndaivaíri. Tekotevẽ uvei.

                Ñahendu kuri Hesu omosẽramo umi oñemúva tupao korapýpe. Ipochy voi hendive kuéra ou haguére ojapo Ñandejára rógagui peteĩ mercado, pláta pota omotenondégui ndohejái pa’ũ oñeñembo’e haguã tupaópe.  Nointeresái chupe kuéra Ñandejára, oñemusénte hikuái. Péva ombohuguy raku Hesúpe, omongavaju ha omuña voi chupe kuéra karia’ýicha.

                Ñanerakate’ỹ ha ñañeha’ã vaerã niko che reindy ha nde che irũ, umi ñande tupao, Capilla, Catecismo, grupo, fiesta patronal ha ñembo’égui, ha opa mba’e jajapóva Ñandejára rérape, ani haguã ou oiko peteĩ pláta jeheka, jehechaukarã ha mba’e. Ani oiko hendape’ỹ, tie’ỹ omongy’áva Ñandejára réra. Umía la omorrenegáva raka’e Hesúpe.

                Ha upéicha avei ñanembopochy umi pláta potágui noponderáiva hapicháre, ohundíva heta rekove ha ombohasýva ipehenguépe. Ha ko’yteve ñanembo ruguy raku umi omuñáva, omosẽva, ombohasýva ha ojukáva mitã, mboriahu, campesino, indígena, ha umi ikatu’ỹva oñedefende.

                Péichagua pochy ñañandúramo ñande pype, ãichagua tembiapo vai rovái, jasapukái ha jajetyvyróramo henondépe, ñañandu ha jajapo avei upe Ñandejára oñandu vaekue, oja’o ha omuña  haguéicha omosẽ haguã aña nguéra tupaógui.

Pa’i Jasy.