Ñahendu Hesu Ñe’ẽ. Viernes 26º Durante el Año

Escucha el evangelio y la reflexión en: https://youtu.be/A-Mo-7z6xPo

Viernes 26 Durante el Año Lucas 10, 13 – 16

Upérõ Jesús he’i: Aichejáranga peẽ Corazingua. Aichejáranga peẽ Betsaidagua. Tíro ha Sidónpe mba’e ajapo rire umi milágro ajapóva pende apytépe, yma ojevy va’erã mo’ã hikuái Ñandejára gotyo. Omonde vaerã mo’ã hikuái ao vosakue ha oguapy tanimbu apytépe ohechauka hag̃ua oñembyasyha hikuái ipekádogui.

Ág̃a ára pahápe, peñenupã rasyvéta umi Tíro ha Sidónpe oikóvagui. Ha peẽ Cafarnaumgua, peẽiko peimo’ã Ñandejára pene mog̃uahẽtaha yvágape. Ndaupéichai hína. Pehóta uvei amo Aña retã ruguápe.

Upéi Jesús he’i idisípulo kuérape: — Oimeraẽva pene rendúva, chéve che rendu hína. Ha oimérõ ojahéiva pende rehe, che rehe ojahéi hína. Ha pe che rehe ojahéiva, ojahéi Ñandejárare, che mbouharére.”

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Oime niko he’íva ojapopamaha ojapo vaerã tupaópe. Ikarai, ipriméra comunión, oñeconfirma, omenda tupao ha ohómiva misa hápe ha ñembo’épe. Ha upévare ojerovia Ñandejára katuete ohovasataha ichupe tuicha háicha.

Angete ñahendu mba’éichapa Jesús oja’o umi tavagua ha’e oiko hápe. Ko’ãva niko ojeroviaiterei Jesús oiko haguére ijapytépe kuéra. Ohecha ha ohendu hikuái Jesús pe ohasávo ijykére ha mba’e. Opáichavo nopenái hese hikuái ha ndoguerovái hekove. Ha upéva añónte, he’i chupe kuéra Jesús, naiporã mo’ãiha ichupekuéra mba’everã.

Péva pe Jesús ñe’ẽ avei ikatu ñande ñamboguapy ñande jehe. Ndaha’éi ramo 100 % cristiano ñande ñaiméva ko tetãme, haimete jahavere hína upéva. Haimete niko opavave ñande karai, taha’e católico, evangélico, protestante, térã ambue Iglesia guáva. Hetaiterei ñaime ja’éva ñande rehe jajeroviaha Jesús re.

Ha mba’eichaitépa upe ñande rekove ojuavy pe Jesús rembipotágui. Mba’éichaitépa heta ñande rapicha oiko asýva ha oikotevẽva. Mboriahu apĩgui ñane renyhẽ. Ñahundipátama ñande rekoha Ñandejára ohejáva ñandéve ñañangareko haguã. Ha’eteku nañamoañetéiva upe Jesús remimbo’e ñande rekovépe. Mombyry vaicha ñande hegui upéva, ñañembohéra ramo jepe cristiano.

Ha upévare ikatu ho’a ñande rehe upe Jesús he’i va’ekue ivalleguápe: Peimo’ã piko peẽ pende pojaitaha yvágare. Araka’e mba’e. Cháke ikatu peho pechyryry amo Aña retã ruguápe.

Ñama’ẽ porã aipóramo che irû ha che reindy, mba’épa tekotevẽ ñamohenda ñande rekovépe, ani haguã hetaite Ñandejára grásia oñeme’ẽ va’ekue ñandéve iguéro ñande hegui amo ipahápe.

Pa’i Jasy.