Ñahendu Hesu. Sábado 15ª Tiempo Durante el Año

Escucha el evangelio y la reflexión en: https://youtu.be/XiKwgfojmvs

Sábado 15º Durante el Año

Mateo 12, 14 – 21

Upérõ, umi fariséo osẽ oho. Oñepyrũ oñomongeta hikuái mba’éichapa ikatúne ojuka Jesúspe.

Jesús oikuaávo ojukaseha chupe hikuái, osẽ oho upégui. Ha heta oĩ umi hapykuéri ohóva. Omonguera opa umi hasývape, ha he’i chupe kuéra ani haguã imandu’a hese avave renondépe. Ha péicha ou ojehu ku Ñandejára he’i vaekue proféta Isaías rupi: Kóvako hína che rembiguái che aiporavo vaekue, che ahayhu ha arohorýva.

Ame’ẽta chupe che Espíritu, ha omyerakuãta teko joja opa rupi.

Avavére nopu’ã mo’ãi ha ndosapukái chéne avavépe, ha avave nohendu mo’ãi chupe pe okáre. Imba’e porãta ikangýva ndive, ha ipy’a porãta oikotevẽva ndive, teko joja ohupytyka peve opavavépe. Hese ojeroviáne opa tetã.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Jaikuaa pe ñe’ẽ he’íva: “Lígape, jakare jepe ojahoga.” Ha la Aña ningo upéicha ñanera’ã ñanembojahoga haguã. Ha’ete umi mitã rusu omboligáva mitãnguéra oñorarairõ haguã ha he’íva peteĩme: “nderepokói chéne inambíre térã hováre.” Ha la mitã ningo ivýro. Ohóma voi katu opoko la hapicha nambíre. Ha oúma ichupe la ótro ha oikóma katu la mokéte, ñemotĩ so’o ha tasẽ. Ha osẽ umi mitãrusu opuka puku ohóvo hesekuéra.

Nointeresái chupekuéra mávapa opyta vai. Ha’e kuéra ohechasénte oñonupãva. Péa la idiversión.

Upeichaite ningo pe Aña ojapo ñande rehe. Oñe’ẽ reity, ñane tenta, ñanembo ruguy raku. Ñanemoingo vai oñondive, ñapu’ã haguã ojuehe. Ñe’ẽ rei, sapukái, tie’ỹ, ñembyepoti, jekutu, jejuka peve oiko. Oñemboharái ha opuka ñande rehe. Ndoikuaaséi mba’eve, sarambikuénte ha’e la helihéncia.

Ñahendu angete oime ndaija’éiva Hesúre ha ojukaséva ichupe. Ha mba’e ojapo Hesu. Ojeínte hapégui. Ha’e nombohovái umi oúva hi’ári mbaretépe. Ndohejái jepe umi hembiapo porã Ñandejára omoĩ va’ekue ipópe ojapo haguã. Oipohano hasýva ohekombo’e hapichápe ha ohovasa opavavépe. Ndoikéi pe Aña lígape.

Jaikuaa jepe ñande nameméi Hesu péicha ojapo. Sapy’ánte ohenonde’a ha ombohovái ichupe kuéra, ha tuicha ojodikuti hikuái. Ha ou hikuái hi’ári kavichu’ícha.

Oiméne niko Ñandejára oñanduka Hesúpe, araka’épa ojehekýi vaerã ha araka’épa ombohovái vaerã ichupekuéra.

Ajépa ñande ñaikotevẽte che irũ ha che reindy pe Ñandejára grásia ñanembo’éva araka’épa iporãve ñambohasánte jeiko vai ha araka’épa ñambohovái vaerã ani haguã ñande raha vaipa. Pe jeikokuaa oñehenóiva “prudencia” hína pe ñaikotevẽva upéva jaikuaa haguã.

Pa’i Alberto Luna.