Ñahendu Hesu. Santa Rosa de Lima ára

Escucha el evangelio y la reflexión en: https://youtu.be/BPZX19x_a5I

30 agosto: Santa Rosa de Lima ára

Mateo 13, 44 – 46

Upérõ Jesús he’i opavavépe: Ñandejára Rréino niko ojogua ku pláta yvyguy kokuépe oñeñotỹvape. Pe ojuhúva, oñotỹ jeýnte hendaguépe. Upéi katu, vy’apópe oho ovendepa opa mba’e oguerekóva ha ojogua pe yvy. Ñandejára Rréino ojogua avei ku ita jeguáre
oñemúva oikóvo. Iporãve ha hepyvéva rekávo manté oikóva. Ágã ojuhu vove katu, oho ovendepa opa mba’e oguerekóva ha ou ojogua.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oñemombe’u niko ñandéve oimeha ohekáva plata yvyguy ha oĩ avei ndojo’óiva yvy ha ohekáva pláta, oha’ãva lotería, térã umi víngokuérare ojeporekáva.

Opa umíva niko oheka hína amo hapópe pe ikatu vaerãva omyenyhẽ hekove vy’águi. Hesu he’i ñandéve jajuhu ramo Ñandejára Rréino ha’e hina ku jatopa ramo guáicha pláta yvyguy, jahecha ramo ha jahayhu ha upévantema voi ñandéve guarã. Ha pe otopáva añete Hesúpe, upéva ohupyty tuicha vy’a ha hesehápe oime voi oheja haguãicha opa mba’e orekóva ha ohayhúva guive oikuaa mboyve ichupe, ani haguã ojavy pe mba’e porãite ojuhúva. Péichaite ningo ojapo kuri Isabel Flores de Oliva.

Peteĩ mitãkuña oiko va’ekue Límape, amo tetã Perúpegua. Imitãite guive pe hova ojoguaite rupi yvotýpe ningo isy oñepyrũ ohenói ichupe Rrósa, ha ipahápe opyta Rosa pe ojekuaa. 1586 pe onace ha omano 1617 pe. 400 año rasamíma ojapo. Ha’e ndaha’éi vaekue hermana. Ha’e opytánte vaekue oiko hóga korapýpe, peteĩ oga’i oñembo’e haguãme.

Omonde ao morotĩ ha peteĩ mánto hũ oiporu háicha umi hermana dominica. Upégui ha’e osẽmiva mísa ha ñembo’e hápe, oñandu hasývape, oipytyvõ oikotevẽvape ha mboriahúpe, ombo’e catecismo mitâme hamba’e. Ojehayhueterei ndaje la ipuéblope.

Mitãkuña neporãva voi ndaje raka’e la Rrósa. Ha ndofaltái la omendaséva hese ha oikóva voi hapykuéri. Ha’e katu ningo ojuhúma la ipláta yvyguy. Ñandejára Hesukrístonte ha’e oikuaase, ha ichupénte ha’e ome’ẽse hekove. Ha upévare, ndofaltái ramo jepe ichupe la imenarã, ha’e nomendái.

Ñane santo Roque González javegua ningo la Santa Rosa raka’e. Ha jepevéramo ha’ekuéra ndojotopái kuri oikove aja, mombyrymi oimégui ojuehegui, mokõivévante iñakã raku la Ñandejára Rréino re. Hatã oñeprende Ñandejára Hesukrístore, oñeme’ẽ mbaite ichupe. Hesehápe ombo’e Ñandejára rape ha oiko hapicha oikotevẽvare.

Mba’épa reñandu che reindy ha nde che irũ ko’ã ñande rapicha renondépe. Ohayhúgui ipy’aite guive Ñandejára Hesukrístope ohejáva opa ohejáva ha omotenonde ichupe hekovépe opaite mba’e rekovia.

Pa’i Alberto Luna.