Ñahendu Jesús Ñe’ẽ. Sábado 22º Durante el Año

Escucha el evangelio y la reflexión en: https://youtu.be/VqRqIxWNzxg

Sábado 22º Durante el Año

San Lucas 6, 1 – 5

Peteĩ pytu’uha ára jave, Jesús ha idisípulokuéra ohasa ohóvo peteĩ trigoty rupi. Idisípulokuéra oipo’o ohóvo hi’a, ojykýi ipópe ha ho’u. Umi fariséo he’i chupekuéra:— Pejapo’ỹ va’erã pejapo hína. Pytu’uha árape niko péicha ndajajapóiva.

Jesús katu he’i chupekuéra: — Peikuaa porã niko mba’épa he’i Ñandejára ñe’ẽme ku David ha iñirũ nguéra iñembyahýi ramo guare. Oike va’ekue hikuái Tupaópe ha ho’u umi pan Ñandejárape oñemboyke va’ekue. Umíva umi pan niko pa’ikuérape guarã añónte va’ekue. Che pópe oĩ hína ha’évo mba’e-mba’épa ikatu jajapo pytu’uha árape.

Ñandejára Jesucristo ñe’ẽ.

ÑAMBOGUEJYMI ÑANDE REKOVÉPE

Ñanemandu’ámi ñahendúramo peteĩ ambulánsia hyapúva oúvo tapére. Ajépa ñande japyta jajesareko ha ñama’ẽ porã opa hendáguio ani ágã ohasa ñande ári mba’e upe mba’yru. Ambulánsia peguarã niko ndaipóri semáforo pytã, ndaipóri jeiko mbegue, ndaipóri contramano, ndaipóri polisía ojoko va’erã ichupe. Tohasáke ha toguahẽkepe oho ha’e opena’ỹre umi tránsito rehegua léire.

Ha mba’érepa upéva. Ha ojehecha niko ñeikotevẽme. Oraha niko hina hasyetéva. Ha umi jejopy vaípe oĩva peguarã niko ojepe’ápa umi léi hesãiva peguarã ovaléva, ikatu haguãicha ojesalva pe tapicha rekove.

Upe léi tuichavéva niko upe ñande rekove. Ha léi kuéra niko hekoitépe oĩ haguã oĩ va’erã ñanepytyvõ haguã ha ndaha’éi oĩ vaerã ñande ári ñande jopy haguã ha ñande reko asy.

Upéi léi niko ha’e peteĩ tembiporu ñane pytyvõ vaerãva jaiko porãve haguã tekojojápe oñondive. Ndaha’éi peteĩ kyse ojeporu vaerãva ñane kytĩ ha ñanembohuguy syry haguã ha ojeporúva ombohasa asy haguã avavévape. Heta vése niko jahecha upe léi ojeporu vai ha ojeity umi ikangyvéva árinte.

He’i háicha ñe’ẽ: “Mboriahu akã árinte ho’a rájo”. Ha jahecha sapy’a umi imbareteve ha iplatavévape guarã katu ndaipóriha léi ojokóva chupekuéra.

Jahecha ha jaikuaa porãramo jepe ha’ekuéra hembiapo vaíha ha ndojapóiha upe léi he’i háicha, opáichavo umi abogádo ha huekuéra, pláta ombovolsíllo, ha oipokãnte upe léi he’íva osẽ haguã mba’evérõ guaicha. Ha karai guasúicha oiko opavave apytépe. Hesu niko omomba’e upe Ñandejára léi ha ohayhu upe ñanembo’éva. Ha’e he’i ñandéve tekotevẽha opavave ñañeha’ã jajapo, ha ñañeha’ã vaerãha avei jajapo hekópe umi léi he’íva. Taha’e kostitusión, ha opaichagua léi oñemoĩva ñane retãme ha ñande siudápe.

Opáichavo Hesu ñanembo’e avei umi léi ñane pytyvõ va’erãha ha noñemoirĩ ñane apytĩ ha ñande reko asy haguã. Noñemoĩri va’erãha ikangýva ha oikotevẽva apére léi ombopy’aropúva ichupe. Umíchagua léigui tekotevẽ jajetyvyro ha jaheka toñemohenda ñanepytyvõ haguãicha añete. Mba’épa reñandu.

Pa’i Jasy.