Ñahendu Jesús Ñe’ẽ. Sábado 27º Durante el Año

Escucha el evangelio y la reflexión en: https://youtu.be/9BvJ-t6VD-E

Sábado 27º Durante el Año

Lucas 11, 27 – 28

Peteĩ ára, Jesús oñe’ẽ aja, osẽ sapy’a peteĩ kuña osapukái chupe:— Tuichaitépa oime va’erã Ñandejára ohovasa ra’e pe kuña nde reru va’ekue ko yvy ári, ha ne mokambu va’ekuépe.

Ha’e katu he’i: — Tuichave ojehovasa va’erã katu umi ohendúva Ñandejára Ñe’ẽ ha ojapóva pe ha’e he’íva.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE

Ajepa ningo heta oikóva pe sy imembýre. Oñandu guive ipy’ápe ningo oikóma oñangareko ijehe ou porãite haguã. Ha pe imemby onase riremínte ombohasa jehasa asy vy’ápe ha tasẽ pukápe, ohupíramo imemby ijyva ári.

Pe sy niko omoirũ mante okakuaávo ohóvo, ha ovy’a ipy’aite guive ohecháramo osẽ porã ichupe imemby. Ha pevaite ningo oñandu ko kuñakarai ohendúva hina Hesúpe oñe’ẽ ha ombo’e aja hapichápe. Ha oguerosapukái upe hemiandu opavave renondépe oguerohorývo Hesu sýpe. He’i ovy’aiténeha Tupãsy María peichaite osẽ porã haguére chupe imemby.

Upéicha he’ívo Hesúpe, ko kuñakarai he’iramo guáicha: – Aipotaite piko peteĩ che memby ndeichagua osẽ porãitéva. Kova ko ñe’ẽ ikatu avei ñamboguapymi ñande jehe. Ñanemandu’ami ñande sy ha ñande ru rehe avei. Térã katu umi ñande rogagua ñanemongakuaa va’ekue rehe, ñande tia, ñande aguéla, ñane reindy, ñane maína, ñane maéstrama katu.

Ha’ekuéra heta oiko vaekue ñande reheve, oiméne oñongatúgui ipy’ápe heta mba’e porã oipotáva ñandéve guarã. Iñesperánsa raka’e ñande rehe, tajakakuaa porã, tañaneresãi, tosẽ porãmba ñandéve opa mba’e jajapóva ha tajavy’a.

Hesu katu he’i ñandéve, pe tapicha osẽ porãva ndaha’éi katuete upe osẽva isy, itúva térã ihéntekuéra oipota háicha ha omboaguaráva ichupe kuéra. Ha’e he’i pe osẽ porãva hína upe oikuaa ha ojapóva hekovépe Ñandejára rembipota. Peteĩ teĩ ñande niko jareko marãpa ñaime ko yvy apére. Nañaime reiri ko’ápe.

Oĩ hina ñane rembiaporã tekotevẽva jaikuaa ha jajapo hekópe. Ñandejára ñande apohare niko oikuaa ha oipota avei ñande jaikuaa, jahayhu ha jajapo upe tembiapo, pe misión ome’ẽ va’ekue ñandéve ñande jokuáivo ko yvy apére. Ha upéva jajapóvo jajuhu haguã vy’a añete.

Oiméramo ñande avei, che irû ha che reindy, jareko ñande familia, ñane memby ha ñande ra’ykuéra, ñapensami oimépa jaipóta katuete osẽ ñandéve ñande jaipota háicha. Térãpa jaipota oiko hekovépe Ñandejára oipota háicha, ha tosẽ porã hikuái Ñandejára renondépe.

Pa’i Jasy.