Ñahendu Hesu. Domingo Semana 28ª TO

Escucha el evangelio y la reflexión en: https://youtu.be/VPL3-SE80fo?si=ysnRaWiYh5HNKKAS

Domingo 28ª TO Ciclo A

Mateo 22, 1 14

Jesús omombe’u opavavépe kóva ko káso: Ñandejára Rréino niko ojogua ku rréi peteĩme ojapo va’ekue karu guasu ita’ýra omendáta haguére. Omondo ndaje umi hembiguáipe ohenói hag̃ua opa umi oñekonvida vaekuépe ou hag̃ua. Ipahápe, avave ndouséi.

Upémarõ omondo jey voi ambue hembiguái he’ikávo chupekuéra, “Tembi’u niko oĩmbáma. Umi che rymba ikyra-kyravéva niko ajuka. Pejúntema javy’a”. Amo ipahápe avave ndoúi. Avave nopenái hese. Oĩ ndaje ohóva ohecha ijyvy, ambue katu oho oñemu. Oĩ katu osẽva umi tembiguáipe ha heta oinupã rire ojuka.

Péva ombopochy pe rréipe. Omondo upémarõ isoldadokuéra ojuka hag̃ua umi hembiguái jukaharépe, ha ohapypa hogakuéra. Upéi katu he’i hembiguaikuérape, “Oĩmbáma niko ko che ra’y menda rehegua karu guasu. Umi ajerure ypy vaekuépe niko iporãve voi ndoúi che rógape. Tapeho opa rupi ha opa pejuhúvape peje tou.”

Umi hembiguái osẽ ha ogueru opa ojuhúva. Oĩ heko porãva ha oĩ nahániriva. Ha peteĩcha ohopa joa hikuái. Omyenyhẽ hikuái pe óga.

Upéi katu pe rréi oho ohecha máva-mávapa umi ou va’ekue. Ijapytepekuéra ohecha sapy’a peteĩ oñemonde porã’ỹ va’ekue mendahápe g̃uarãicha. He’i chupe, “Che irũ, mba’éicha rupi piko reike che rógape. Ne reñemondéi niko mendahápe g̃uarãicha”. Pe kuimba’e katu okirirĩnte chugui. Upérõ pe rréi he’i hembiguaikuérape, “Peipykua ha peipokua, ha pemombo okápe, iñypytũháme. Upépe tahasẽ ha hãi tomopururũ”.

Upéi he’i Jesús chupekuéra: — Heta niko hína umi oñekonvidáva, ha mbovy umi ojeporavóva.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Oiméramo omendáva, isánto árava, mitãkuña15 áño, mitã karai, oñekonvida hetápe ha oñeha’arõ oupa. Hesu niko ombojoja Ñandejára Rréino peteĩ karu guasu menda rehegua rehe. Ñandejára ndaje oipotaiterei jaike hendápe javy’a haguã Hesu ndive, ñaime haguã avei oñondive vy’ápe. Ndoipotái avave opyta mésa guýpe.

Upévare ojokuái hetápe ha ombou ñande rapicha ñane konvidáva jaike haguã comunidápe, ñande aty haguã tupaópe, capíllape, grúpope, jaha haguã rretírope ha mba’e.

Ha umi oñehenóiva ndouséiramo, ndaje oguapy Ñandejárare. Opáichavo ndohejái oñehundi pe ha’e ome’ẽséva ha oheka opárupi oikeséva oguapy imesápe, taha’e ha’éva. Ha upépe che irũ ha che reindy jaike paite, imba’e porãva ha naisantopáiva. Ha péva niko hína ñande Iglésia, opaichagua ñahendúva Ñandejára konvíte. Ndaha’éi katuete ñande ao potĩmbáva.

ÑAÑEMBO’E OÑONDIVE

Ñandejára ore Ru ore renóiva reipotágui roime nde Iglésiape vy’apópe nde ra’y Hesu ndive. Ore pytyvõmíkena ikatu haguãicha romopotĩ rohóvo tapére ore ao ky’a. Ágã ára pahápe ropyta haguãicha nde rógape pe vy’a guasuete opave’ỹvape. Amén.

Pa’i Jasy.