Ñahendu Jesús Ñe’ẽ. Viernes 24º Durante el Año

Escucha el evangelio y la reflexión en: https://youtu.be/5eaD31Y0Lgk

Viernes 24º Durante el Año

Lucas 8, 1 – 3

Upérõ Jesús oho opa rupi omyerakuã pe marandu porã Ñandejára Rréino rehegua. Umi 12 apóstol omoirũ chupe, ha upéicha avei heta kuña. Umívagui oime ha’e omosẽ va’ekue demóño, ha oime omonguera va’ekue mba’asýgui.

Ijapytépe oĩ va’ekue María, hérava avei Magdaléna. Chugui niko Jesús omosẽ va’ekue 7 demóño. Oĩ avei Juana, Cuza rembireko, upéva Herodes rembiguái ijeroviahavéva, oĩ Susana ha heta ambue, oipytyvõva chupe mba’e repy oguerekóva reheve.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Ajépa ningo jaháramo ñembo’e hápe, mísa hápe, ha ñama’ẽramo grupokuéra oguatáva komunidápe ha heta organización, barrio terã escuelaguápe, hetave jahecha jepi umícha hápe kuña kuimba’égui.

Tuichaiterei niko upe tembiapo kuñakuéra ojapóva ñande Iglesia katólicape. Ha upéicha he’i ñande obispokuéra ijatýramo guare tupao guasu Aparecídape, amo Brasílpe: “Kuñanguera ha’e umi hetavéva ñande komunidakuérape, ha’ekuéra ha’e umi oheko mbo’e tenondéva imembykuérape ijeroviápe ha umi oipytyvõva pa’i ha obíspokuérape hembiapópe, upévare umi pa’i, diácono ha obíspokuéra oñangareko va’erã hesekuéra, omomba’e vaerã hembiapo ha orrespeta va’erã chupekuéra” (456).

Jahecha Jesúspe omoirũ hague apóstol kuéra, ha ijykére oĩ vaekue avei kuñanguéra oguatáva, oipytyvõva ichupekuéra hembiapópe ha hemikotevẽpe. Tetã Israélpe yma umi mbo’ehárakuéra ndorekói va’ekue hemimbo’e apytépe kuñanguéra.

Jesús katu ohechauka ñandéve orekoha avei idisípulo apytépe kuñanguéra, omoirũva ichupe ha ijapóstolkuérape: María Magdalena, Susana, Juana, Martha ha María, María Santiago sy ha Hesu sy avei oguatáva imemby ndive.

Jesús nombotapykuéi kuñáme ojapo haguéicha umi mbo’ehára ymave guare. Ha’e oñemoirũ hesekuéra ha oñangareko, oipohano, ohekombo’e ichupekuéra ojapo háicha avei kuimba’ekuéra ndive. Ombojoja ijeroviápe kuimba’e ha kuña.

Amo ipahápe niko umi opyta va’ekue Hesu ndive pe ikurusu máta peve ha’e va’ekue umi kuña nguéra omoirũ va’ekue ichupe. Kuimba’ekuéra katu okañymba ha’ekuéra oñotỹ aja Jesús rete. Ha Jesús oikove jevy rire tenonderã ojehechauka umi kuñanguérape. Ha kuña nguérape ojerure omombe’u haguã ijapóstolkuérape ha’e oikove jevy hague.

Tekotevẽ avei ñande kuimba’éva anive ñamboyke térã ñambotapykue kuñáme, jahechakuaave uvei ha ñame’ẽve ichupe kuéra upe henda tee, ñahenduve iñe’ẽ ha ñamomba’eve upe ojapóva. Ha kuñanguéra katu ani otĩ ohekávo oñembojojave haguã kuimba’e ndive ogapýpe, organizaciónkuérape, ñande Iglésiape. Ikatu haguãicha mokoĩvéva jaguata joja oñondive ha ñañopytyvõ hekópe Jesús ñanembo’e haguéicha.

Pa’i Jasy.