Ñahendu Hesu. Lunes Semana 28ª TO

Escucha el evangelio y la reflexión en: https://youtu.be/DNAZQYMTTik

Lunes 28ª TO

Lucas 11, 29 – 32

Heta hetave upérõ umi oñembojáva ojapysaka haguã Jesús rehe. Ha osẽ ha’e he’i chupekuéra: Peẽ tekove ahẽ ko’agãgua ndaje pejerure chéve aipo milágro. Ndapehecha mo’ãi pehechaséva.

Ñandejára ohechaukáta peẽme proféta Jonás rehe ojapo va’ekue. Ha ku Ñandejára omondo haguéicha Jonáspe ohesape’a haguã Níniveguápe, upéicha avei che, tesape’a hína peẽme guarã.

Ágã ára pahápe, peimévo Ñandejára renondépe, ku Rréina Sebápegua, opu’ãne ave ágã ha pene moĩ vai Ñandejára renondépe. Ha’e niko mombyry-mombyryvégui oho va’ekue rréi Salomón rendápe ohendu haguã iñarandukue. Ha che ha’e peẽme, peteĩ tuichaitevéva Salomóngui oĩ hína ko pene renondépe ko’ágã.

Ágã ára pahápe, umi Ninivegua avei opu’ãne ha pene moĩ vaíne peẽme. Ha’ekuéra niko ojere vaekue Ñandejára gotyo Jonás oñemoñe’ẽ ramo chupe kuéra. Ha ko’ápe oĩ hína peteĩ tuichaitevéva Jonásgui.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Oĩ ningo avei ñande apytépe ohenóiva Ñandejára ojapo haguã milágro. Oipotáva Ñandejára omohendapa chupe kuéra hemikotevẽ. Oĩ omyangekóiva sántokuérape ohupyty haguã loteria, ojejuhu haguã, imba’e kañýramo otopauka haguã. Nomba’apóiva ojuhu haguã hembiaporã, ohóramo mombyry oguahẽ porã haguã, ha umícha.

Heta niko oime orekóva Ñandejára, Tupãsy ha isánto kuérape hembijokuáiramo, ojevale haguã hesekuérante. Ha hekovépe mombyry ichugui aipo ohendu haguã Ñandejára ñe’ẽ, ñembo’e, oguata haguã hapichakuéra ndive komunidápe hamba’e. Ojerovia ohupyty peve upe oipotáva, haete ku oñembojáva Ñandejárare ventáha rekávonte. upe hekove katu nomohendái Ñandejára oipota háicha, naiñe’ẽ rendúi ichupe.

Ha upéva ningo la Hesu ohechakuaáva umi hapicha oñembojáva hese rehe. Oipota ha’e ojapopa chupe kuéra, ha omboguejy chupe kuéra yvága henondépe. Ha oikose avei iñakãre upéi, omohenda’ỹre hekove ha’e ombo’e háicha chupekuéra.

Upévare Hesu he’i Jonás rehe imandu’a haguã. Jonás ningo oho va’ekue Nínivepe ha he’i umi upépe oikóvape tekotevẽha ojeheja hembiapo vaígui ha ojevy Ñandejára gotyo.

Ha umi Ninivegua opena vaekue Jonás ñe’ẽre. Hesu avei imandu’a pe kuñakarai guasu rehe oheja vaekue iválle ha ou mombyryetégui ohendu haguã Rey Salomon ñe’ẽ arandu. Ndaha’éi hína che irũ ha che reindy, ojajái ha omimbipáva la he’íséva. Ndaha’éi láta pararã. Ñande rekovére oguapýva ha ojekuaáva ñane rembiapópe hína la ovaléva.

Pa’i Jasy.