Ñahendu Hesu. Sábado 8º Tiempo Durante el Año

Escucha el evangelio y la reflexión en: https://youtu.be/MhaH1nCW9kc

Sábado 8ª TDA

Marcos 11, 27-33

Upérõ Jesús ha idisípulokuéra oho jey Jerusalénpe. Jesús oguata aja pe tupao rupi oguãhẽ hendápe pa’ikuéra, Moises léi ombo’éva ha mburuvichakuéra.

Oporandu Jesúspe hikuái:— Mávaiko nembou rejapo haguã umi mba’e rejapóva. Mba’éicha rupi rejapo ã mba’e.

Jesús he’i chupekuéra: — Che ave aporandúta peẽme peteĩ mba’e. Ha peje kuaa ramo chéve, amombe’úta peẽme mba’éicha rupípa ajapo ko’ã mba’e. Peje chéve, máva piko ombou raka’e Juánpe oporomongarai haguã. Ñandejára va’ekue piko térã yvypórante.

Ha oñepyrũ oñomongeta kyre’ỹ hikuái. Ipahápe osẽ he’i ojupe “Ágã ja’érõ Ñandejára ombou hague chupe, he’íta ñandéve, ‘Mba’ére péicharõ ndaperoviái ra’e chupe’ Ha ndaikatúi ave ja’e yvypóra hague.

Ha okyhyjégui hikuái oñepu’ãmba ramo guarã hesekuéra, nde’íri mba’eve. Oje’e niko Juan rehe proféta hague ha’e. Upévare he’i hikuái Jesúspe: — Ndoroikuaái.

Upépe Jesús he’i chupekuéra:— Péicharõ, che avei namombe’u mo’ãi peẽme mávapa chembou ajapo ko’ã mba’e.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE

Nde píko máva eju haguã gua’u ko’ápe ere ereséva ha ejapo ejaposéva. Péicha ningo oje’e jepi umi okáguio oúvape omoinge ikuchára ha omohendase igústope opa mba’e, oikuaa’ỹre ha oporandu’ỹre mba’éichapa upépe ojejapóva jepi.

Péva sapy’ánte oiko avei ñande rehe jaiko vaíramo ñande rapicha ndive, térã peteĩ aty, familia, komunida, organización, sindicato pe.

Sapy’ánte ko jajoavýramo ambue ndive, ñasẽ haguã tapépe tekotevẽ ñañemongeta porã ha ñañohendu raẽ. Py’a porã reheve mante ikatu jahechakuaa ojupe ñañandúva, ñaikotevẽva ha ñande derecho.

Péicha mante avei jafalláramo oñondive ikatu jahechakuaa ha ñañoperdona. Jajúramo ñamoĩ pakóva pire ñande rapichápe jaity haguãicha ha nañandepy’áiramo ñahendu haguã oñandúva katu ndaipóri py’aguapy raperã.

Ha péicha avei ningo ou kuri Hesúpe umi Pa’i ruvicha tupao Jerusalén gua. Tata pirirícha ou oporandu chupe mba’éicha rupípa ou raka’e omosẽ tupaógui umi upépe oñemúvape. Hesu voi ohechakuaa hesekuéra ndouiha py’a porãme ohendu haguãicha ichupe.

Pochy ha py’aro reheve katu ou, oity haguãicha ichupe ñuhãme. Hesu katu nopyrũi iñuhã. Ojehekýinte chuguikuéra ha ombohasa, ágã oĩ meve hikuái oñemongeta porã ha ohendu haguãicha ichupe.

Pa’i Alberto Luna.