Ñahendu Jesús Ñe’ẽ. Sábado Semana 32° Durante el Año

Escucha el evangelio y la reflexión en: https://youtu.be/etJ42InyZGk

Sábado 32° Durante el Año

Lucas 18, 1 -8

Upérõ Jesús omombe’u idisípulo kuérape peteĩ káso ohechauka hag̃ua ichupekuéra mba’éichapa oñembo’evaerã, ani hag̃ua ipy’a kangy.

Oiko va’ekue ndaje raka’e peteĩ puéblope peteĩ juez ndokyhyjéiva Tupãgui ha nomomba’éi etéva voi avavépe. Ha upépe ndaje oiko va’ekue avei peteĩ viúda py’ỹinte ohóva hendápe ha he’ímiva chupe, “Ág̃a ku pléito arekóva hína oúvo ndéve kena ehecha osẽ porã hag̃ua chéve”. Ñepyrũrã pe juez nopenái hese.

Upéi katu he’i ipy’apýpe, “Ndakyhyjéi ramo jepe Ñandejáragui, ha namomba’éi ave avavépe, aipytyvõta chupe. Ỹro niko manterei ág̃a oúne che rendápe, che monguerái peve.”

Upéi katu Jesús he’ive: Pehechápa hína mba’épa he’i pe juez reko karẽ. Peẽ piko peimo’ã Ñandejára noipytyvõ
mo’ãi umi ha’e oiporavo va’ekuépe, ára ha pyhare oñembo’éva chupe. Peimo’ã nga’u piko ha’e oñeha’ãrõukáne hag̃ua. Nahániri. Pya’eterei niko pene pytyvõ vaerã. Ha ág̃a che aju jey vove yvy ári, ajuhúnepa Ñandejárare ojeroviáva.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Jahechaningo oĩha ñande apytépe karai juezkuéra oñakãitýva poguasukuéra renondépe ha ojepokãva oñembohasáramo Ichupekuéra pirapire mesaguýpente. Pya’e ha porã omboguata ikuatiakuéra ha omohendapa oĩva guive ley onohẽ haguãicha ha’ekuéra oipotáva. Mboriahu, campesino, indígena kuatiakuéra katu ombo’yke,
ombohasa, ha oñembotavy Ichuguikuéra, ndorekóigui mba’eve ome’ẽva’ẽra Ichupe.

Jesús omombe’u peteĩ káso. Oĩ hague peteĩ távape peteĩ juez aña peichagua. He’íva ijehe ndokyhyjéiha Tupãgui ha nomomba’eiha hapichápe, ijehénte oma’ẽva ha platapúpe oguatáva. Ha upévare nohendúi peteĩ viúda poriahúpe oúva ára ha ára ojerure omohenda haguã ichupe upe pléito orekóva. Ha oñandúmaramo ndohejamo’ãiha ichupe,
kane’õ ha kueráigui osẽ ome’ẽ ichupe upe ojeruréva. Anive haguã ou omyangekói chupe hógape ha opytyu’u haguã ichugui.

Jesús he’i ñandéve, ñande ñañembo’éramo, jajeroviava’ẽraha Ñandejára ndaha’éiha peichagua juez ipy’aratãva. Ha ohendúne haguã katuete ipy’aite guive upe jajerure asýva ichupe ára ha pyhare. Jajeroviava’erã japokóne haguã Ñandejára korasõre ha ome’ẽtaha, ha pya’e ave, upe jajeruréva ichupe.

Nanemomandu’áipa che reindy ha nde che irũ, ko viúda, umi imboriahu ha ikangyvéva, campesino, indígena, bañadogua ha mba’e.

Oikóva manifestación pe, ombota autoridad, institución, municipalidad, gobernación rokẽnguéra. Ko viúda poriahu, ndohejaiva’ekue upe juez añáme, ohechauka mboriahu naikane’õva’erãiha
ohekávo upe imba’éva ha iderecho. Ohupyty peve.

Pa’i Jasy.