Ñahendu Jesús Ñe’ẽ. Sábado 10a Durante el Año

Escucha el evangelio y la reflexión en: https://youtu.be/llMnhquirVE?si=PnM7Koq669ueHaOe

Ñahendu Jesús Ñe’ẽ. Sábado 10a Durante el Año

               Mateo 5, 33 – 37

Upérõ Jesús he´i idisípulokuérape:Peikuaa oje’e hague pende ypykuérape yma: “Ani Ñandejára rérare ere rejapotaha mba’e rejapo’ỹtava.”Che katu ha’e peẽme: “Ani mba’evére peje pejapotaha mba’e pejapo’ỹtava. Aníke yvágare, cháke upépe oguapy hína Ñandejára. Ani yvýre, cháke pévako Ñandejára pyenda hína. Ani Jerusalén rehe, cháke upévako Ñandejára mba’e.

Pene akãre jepe ani peme’ẽ pene ñe’ẽ. Peẽ niko ndaikatúi peteĩ pene akã raguénte jepe pemyapatĩ térã pemohũ. Peme’ẽta ramo pene ñe’ẽ, pejénte ‘Néi’, térã ‘Nahániri’. Pejeve ramo, péva ou Añágui.”

Ñandejára
Jesucristo ñe’ẽ

ÑAMBOGUEJY ÑANDE
REKOVÉPE

            He’i ningo peteĩ purahéi: “El tiempo hatã oiko ñane akã omoapatĩ,
ñande rova omocha’ĩ ha ndaikatúi jajoko”. Hesu he’i avei noimeiha ñande
pópe peteĩ ñane akãraguénte jepe jajoko ani haguã morotĩ oguahẽ vove hi’ára
iñapatĩ haguã. Aipo ramo, ñande ndaikatúi ramo jajoko ñane akãrague jepe ani
ho’a térã ani iñapatĩ piko araka’e mba’e oĩta ñande pópe yvy, kuarahy, arai ha
yvága.

Upévare he’i Hesu
nda’ijaiha ñandéve ja’évo oikotaha katuete pe ñande ja’e háicha. Nda’ijái
ñandéve ñame’ẽ ñane ñe’ẽ ñahenóivo yvy, yvága, Ñandejára jepe, ja’évo péicha ha
péicha oikotaha. Naiporãi ñamoĩ Ñandejárape ñane ñe’ẽ rapykuéri, ani haguã
jaiporu hendape’ỹ ha ñambojapu Ñandejárape. Ndajaikuaáigui añéte ñande oikótapa
ja’e haichaite. Ñande niko ndajarekói pe ñe’ẽ paha, pe “última palabra” oje’éva
noiméi ñande pópe, upéva opyta hína Ñandejárape.

Péva nde’iséi hina
ñane ñe’ẽ ndovaleiha. Ndaupéichai hina. Pe ñane ñe’ẽ ningo ijehegui voi tuicha
mba’e hina ha upévare avei natekotevẽi ñahenói Ñandejárape hapykuéri. Natekotevẽi
ñambopepo térã ñambohuguái ñane ñe’ẽ. Ja’e porãnte vaerã niko pe jahecháva,
ñañandúva ha jaipotáva ñande py’aite guive, ñande japu’ỹre, ja’énte upe
añetegua ha upéva ovaletereíma.

Pe jaikuaávante ja’e ha pe ndajaikuaáiva katu ja’e porãnte ndajaikuaaiha. Jaiporavo ñe’ẽ porã ha jaipe’a ñande jurúgui ñe’ẽ pochy ha tie’ỹ ombopy’a rasy vaerãva ñande rapichápe. Ñapensa va’erã niko umi mba’e ja’étava, añetépa, oipytyvõtapa ñande rapichápe.

Sapy’ánteko che reindy ha nde che irũ, jaikuaa porã peteĩ mba’e añeteha ha katu jaha ramo ja’e vai guasu ñande rapicha rovápe, térã katu opavave renondépe, ikatu nañaipytyvõi ichupe. Ikatu iporãve hína ñaha’arõ ramo ha’eño ha py’aguapýpe porã ja’e upe ja’e va’erã. Mba’épa nde reñandu.

Pa’i
Alberto Luna.