Ñahendu Hesu. Viernes 11a Semana TO

Escucha el evangelio y la reflexión en: https://youtu.be/0BqtMLEqk1A

Solemnidad Hesu korasõ marangatu  Mateo

11, 25 – 30

  Upérõ
Jesús he’i: Che Ru, nde pópe niko oĩ yvága ha yvy. Romomba’e guasu reñomi
haguére ko’ã mba’e umi iñarandu ha imba’e kuaávagui, ha reikuaauka haguére umi
iñarandu’ỹvape.  Upéicha che Ru, péichante voi reipota
vaekue ojehu.

      Che Ru niko omoĩ opa mba’e che pópe. Avave
ndoikuaái Ñandejára Ra’ýpe, Túva añónte. Ha avave ndoikuaái Túvape, Ñandejára
Ra’y añónte, ha umi che  aikuaaukasévape.

“Peju che rendápe opa peẽ pene kane’õ ha pemba’apo pohýiva,
ha che ndive pepytu’úta. Peheja tamoĩ pende apére che júgo, ha pejapo che
ha’éva peẽme. Ha peikuaáta che py’a porãha ha ndajejapoiha, ha che ndive pejuhúta pytu’u.
Pe júgo amoĩ tava pende apére niko ivevúita peẽme, ha ndaipohýi mo’ãi upe
aipotáva peraha”.

Ñandejára
Jesucristo ñe’ẽ

ÑAMBOGUEJY ÑANDE REKOVÉPE

            “Che korasõ sã”.
He’i ningo umi omoñe’ẽva hembiayhúpe,
térã imandu’áva pe máva
ohayhuetévare. Péicha oiméne ja’e ñañandúgui pe mborayhu ñanemosã mbareteha umi jahayhúvare. Umíva niko
ndoje’ói péicha péichante ñane korasõgui.
Ha pe mborayhu ñañandúva akóinte ñanemopy’a kyrỹi ñanemandu’áramo hese kuéra. Péicha
avei ñañandúramo pe jahayhúva nopenái ñande rehe, térã katu ñande reko vai, ñande despresia
mba’e, huguy syry vaicha ñane korasõ.

Ko árape ñama’ẽ
hína pe Ñandejára Hesukrísto korasõ
rehe. Ñama’ẽ ha jahecha ichupe
oñemosã ha osaingo jave kurusúre.
Ñama’ẽ pe ipyti’a ha ikorasõ oñembokua ha huguy syrýva hetaite
ohasa asy rire. Ñama’ẽ asy hese ha
ñañandu ha’e avei oma’ẽ asyha ñande
rehe. He’i ramo guáicha ñandéve: Mborayhu opa mba’e ogueropu’aka. Che aime
nendive, aikuaa hína nde rehasáva.

Ha’e niko nde’íre oipe’átaha ñande ape árigui pe júgo. Ha’e
ningo he’i ombovevuitaha ha hendive ñamboguatáramo ndaipohýi mo’ãiha ñandéve
upe jahupíva. Pe Hesu ñepytyvõ ndaha’éi je’u rei. Ha’e niko ñanemombarete ha
ñanembopy’a guasu jaropu’aka ha ñahenonde’a haguã opaichagua tembiapo pohýi,
opaichagua jejopy vai ha mba’asy vai jepe ra’e.

Mba’etépa hína che irũ ha nde che reindy pe júgo
ipohyivéva nde ajúra ári hína ko’ãga
ite. Mba’etépa upe nde py’apýva ha ombohuguy syrýva hína ne korasõ. Mba’etéguipa oime nekane’õ ha nde kueráima hína reikóvo. Mba’épa
reñandu ha reipota ombovevúi ndéve Ñandejára.

ÑAÑEMBO’E OÑONDIVE

Ñandejára Hesukrísto, nde niko orerayhu
etereígui eheja vaekue oñembohuguy syry jepe ne korasõ ha péicha eipe’a oréve ne mborayhu rokẽ. Che amoĩse nde pópe che rekove,
añeme’ẽse nendive che rapicha kuérape nde reñeme’ẽ háicha. Aipota chesãmbyhy Tupãsy María pórupi. Eme’ẽ chéve umi mba’e aikotevẽva amboguata haguã che rekove nde rejapo haguéicha.
Amén.

Pa’i Alberto
Luna.