Ñahendu Hesu. Viernes 1º Adviento

Escucha el evangelio y la reflexión en: https://youtu.be/RBoPJHOrnu0

Viernes 1 de Adviento Mateo 9, 27 – 31

Jesús ohasa jave ohóvo osẽ hapykuéri mokõi ohecha’ỹva, osapukáiva chupe: Ore poriahuverekomína, nde David ra’y! Ha oike rire Jesús hógape, oguahẽ hendápe umi ohecha’ỹva. Ha Jesús oporandu chupekuéra: Peroviápa che ikatuha pomonguera.

Ha’ekuéra he’i chupe: Roguerovia ore Jára.

Upévo Jesús opoko umi hesáre, ha he’i: Toiko upe peẽ perovia haguéicha. Ha okuera umi hesa ha ohecha porã jevy. Jesús he’i jey-jey chupekuéra: Aníke avave oikuaa kóva.

Ha’ekuéra katu, osẽmi vovénte upégui, opa rupi omombe’u upe Jesús ojapo va’ekue hesekuéra.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Oime niko osegíva Ñandejárape ha tupaópe jahecháva jepi. Grúpope, ñembo’épe. Oĩ opurahéiva kórope, oime oikóva catequísta ramo, animador, celebrador, diácono, pa’i. Jahecháva oguata komunidápe hapichakuéra ndive. Ha upéi katu corrida pukúpe, jahecháma oĩha oguapýva tape yképe.

Okúiva hakãgui ha opytáva. Oho pokã pokã ha upéi katu ojehejaitéma voi komunidágui, ojepo’o pe atýgui. Oguahẽva voínte niko ñande rekovépe kane’õ. Ipuku vove tape niko ñande pytupa vaicha, ñande pila’i. Jaju ñande kuerái ha japoise upe jajapóvagui. Ja’e ñande jupe: Oiméne kóva ndaha’éi che mba’erã mba’e, tajeheja mba’e ichugui.

Ko’ápe oñemombe’u mokõi tapicha ohecha’ỹva ojeruréva Hesúpe oipytyvõ haguã chupekuéra. Ha’e katu ohasánte ijykére ha nopenái vaicha hese kuéra. Opyta pytumbýpe hikuái. Upéicha avei ho’a vove ñande rehe pytũ, ha’eteku Ñandejára nañanerendúi ha nopenáiva ñande rehe. Ha ñande katu upépe ñande tarovátama ñaína.

Omombe’u ñandéve San Mateo, mba’éichapa ko’ã mokõi siégo oho Hesu rapykuéri. Ndopoíri chugui, oguahẽ meve hógape oho ombota hokẽ ha oheka chupe. Hesu upémaramo oporandu chupe kuéra ojeroviápa hese añete. Ha’ekuéra he’i ojeroviaha. Ha jahecháma niko upéichaha, ajépa. Upéicha’ỹ rire niko ojevýma va’erã mo’ã ha opyta jey tape yképe.

Mba’etekópa hína upe nde jerovia che irũ ha nde che reindy. Oimépa remuña upe reroviáva rehecha’ỹ ramo jepe. Ehekápa Ñandejárape terãpa epyta tape yképe.

Oimépa reguata gueteri hapykuéri. Reñemohatãpa nde líño ha nde rape’ípe. Hesu ningo he’i: “Toiko upe perovia haguéicha”. Tuicha mba’e upe jerovia, aje. Ñanemboguatáva jahupyty peve upe ñaha’arõ ha jaipotaitéva.

Pa’i Jasy.