Ñahendu Hesu. Domingo 2º Adviento

Escucha el evangelio y la reflexión en: https://youtu.be/F9tv2rdrgUg

Domingo 2º de Adviento Ciclo C

Lucas 3, 1 – 6.

Mburuvicha guasu Tiberio 15 áño omanda haguépe Rrómape, Poncio Pilato omanda upe jave Judéape. Herodes oisãmbyhy Galilea ha Filipo, ityke’ýra anga katu, Iturea ha Traconítide. Lisanias katu mburuvicha Abilénepe. Anás ha Caifás, mokõivéva pa’i guasu vaekue upérõ.

Umíva umi árape, Tupã oñe’ẽ Juán, Zacarías ra’ýpe, desiértope, ha opa rupi rrío Jordán rembe’y rupi, Juan oiko he’i opavavépe oñemboja va’erãha Tupãre ha oñemongaraika va’erãha, Tupã oheja rei haguã chupekuéra hembiapo vaikue.

Kóva ojehu oĩ háicha proféta Isaías kuatiápe: Oĩ osapukáiva desiértope: “Pembosako’i Ñandejárape haperã, pejapo chupe tape ikarẽ’ỹva.
Umi ñu ipyko’ẽha henyhẽmba va’erã, sérro ha lóma oñembojoja va’erã, umi tape ikarẽva naikarẽvéima va’erã, ha umi ivaíva toñemyatyrõ.
Opavave ohecháne Tupã oporosalvaha.”

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

“Ivaive vove iporã aguĩ” he’íva ningo ñe’ẽ. Ha ñama’ẽramo ñane retãre jahecha heta tape karẽ. Heta mburuvichakuéra ho’a ramo jepe, mbarakajáicha oñembojere ha oñembo’yhápe jeýnte opyta. Ijupe guarãnte oma’ẽ ha hesarái mboriahúgui.

Ñandejára ñe’ẽme ñahendu upe salvación ouha opáichavo. Taivai ivai háicha, upéva ndojokói Ñandejára jeju ñande apytépe. San Lúka omombe’u upe tiémpope avei oĩ hague mburuvichakuéra ndaha’éiva pohã ro’ysã. Rrómape oĩ va’ekue mburuvicha Tiberio, tetã Israel pe Poncio Piláto, Herodes ha pa’i ruvichakuéra ma katu.

Pe Ñandejára ñe’ẽ jepe noñehendukái hóga kuéra rupi. Upe salvación ndoguejýi yvatégui poguasukuéra rupive, nosẽi umi táva ha tetã guasúgui. Upéva rangue Ñandejára ñe’ẽ oñehenduka desiértope, omopu’ãvo umi ha’eño ha ho’ávape, omombaretévo ikangývape, ombyaty ha ojokuái haguã umi tetã ryepýre isarambíva.

Ndépa che irũ ha nde che reindy, epytátante eha’arõ pe salvación ou ndéve yvatégui. Terãpa moõ rehecha nde rekovépe, nde rogapýpe, nde barrio pe, nde rekoha rupi, tekotevẽha emoi porã umi ikarẽva. Ha mba’éichapa nde ikatúne ejapomi tape nde rapicha kuéra ndive pe Ñandejára salvación penderupyty haguã.

ÑAÑEMBO’E OÑONDIVE

Ñandejára ore Ru, nde niko embou va’ekue Hesúpe embyatységui peteĩ tetã pyahu. Rojerure ndéve yvate oiméva ore retãme toguejy, heta rasa orekóva tomboja’o, imbaretéva toñeamansa, imombyrýva hapicha mboriahúgui toñemboja hesekuéra.
Amén.

Pa’i Jasy.