Ñahendu Hesu. Martes 2º Adviento

Escucha el evangelio y la reflexión en: https://youtu.be/SbQQvCSy7V4

Martes 2° de Adviento

Mateo 18, 12 – 14

Upérõ Jesús he’i: – Mba’épa peẽ peimo’ã ojapotaha peteĩ kuimba’e oguerekóva 100 ovecha, okañy ramo chugui peteĩ. Ohejáne ñúme umi 99, oho haguã oheka pe okañy vaekue. Ha ojuhúvo, ovy’aiteve va’erã ko peteĩ ovecha reheve, umi 99 okañy’ỹ va’ekue reheve guágui.
Péicha avei, pende Túva oĩva yvágape ndoipotái oñehundi peteĩnte jepe ko’ãvagui, mitãicha che rehe ojeroviáva.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Ñandejára Jesucristo niko ha’éta hina upe ovecha jára, ha pe Iglesia, tupao, komunida oñembyatýva capilla háre, grupo ha movimiento pe, umíva ha’éta hina pe kora oimeha ijovechakuéra. Ha oime heta ñande rapicha oikóva ñúre, noñembojáiva koráre, iraríva támbo gui ha ndoúiva oñesambyhy haguã Ñandejárare.

Umívare Hesu ojepy’apy, umívape ha’e ohose oheka, ogueru jevy haguã ichupekuéra korápe, ijaty haguã hapichakuéra ndive vy’a pópe.
Papa Francisco he’i tekotevẽha ñande cristiano ñasẽ tupaógui, kapilla gui ha jaha jaheka umi okañývape. Ñahuguaitĩ ñande rapicha mombyry oĩvape. Anive japytánteñaha’arõ ñande rapicha ou tupaópe ha upéi jajeplaguea ndoúi ramo.

Tekotevẽma ñande ñasẽ jaheka umi ndoúivape. Jaha ñaguahẽ ha jaike hógape, ñañembo’e inícho há isantokuéra renondépe, jaguapy hendive kuéra yvyra guýpe há upépe ñahenduka ichupekuéra Ñandejára ñe’ẽ, ñañemongeta ha ñamokyre’ỹ ichupekuéra.

He’i ningo Papa Francisco, pe oñangarekóva ovecháre hyakuã ovecha vaerã. Upéva he’ise ojehe’a vaerãha hesekuéra, oime vaerãha umi hapicha ykére, oguata hendivekuéra, oike vaerã oĩ hápe hikuái ojeguaru’ỹre avavégui.

Hesu avei he’i ñandéve, pe ovecháre oñangarekóva oho vaerã oheka hapichápe ndaha’éi oja’o haguã, ndaha’éi omongavaju haguã ndouvéi haguére.

Oñemboja va’erã vy’a ha mborayhu pópe hendápe ha upéicha avei ogueru va’erã omoguahẽ oime hápe hapichakuéra.

Avei tekotevẽ umi tupaópe oguatáva omoguahẽ porã umi ou jevývape, ani tova puku ha ñe’ẽ vaípe ñambodispara jevy.
Mávapa che irũ ha nde che reindy oime okañy nde hegui hína. Mávapa imombyrýva nde hegui tekotevẽva evisita ha embojeremi, emosã jevy nde jehe ha vy’apópe pejoecha ramo.

Pa’i Jasy.