Ñahendu Jesús Ñe’ẽ. Viernes 21º Durante el Año

Escucha el evangelio y la reflexión en: https://youtu.be/95c5vCVj3CE

Viernes 21º Durante el Año

Mateo 25, 1 – 13

Upérõ Jesús he’i: Ñandejára Rréino niko ojogua ku menda rehegua káso. Oiko va’ekue ndaje raka’e 10 kuñataĩ. Ha peteĩ pyharépe, ilampĩu ipópe osẽ ohuvãitĩ pe menarãme.

Umi kuñataĩ apytépe ndaje oĩ raka’e 5 iñakã tavýva ha 5 iñakã porãva. Umi iñakã tavýva, ogueraha ramo jepe ilampĩu, ndoguerahái aséite peichahágui oikotevẽve ramo guarã. Umi iñakã porãva katu ogueraha ilampĩu ha aséite ryru ave.

Pe menarã hi’arégui oguãhẽ haguã, umi kuñataĩ hopehyipa ha opyta oke. Pyhare pyte rupi katu oñehendu sapy’a peteĩ osapukáiva, “Na’ápe oúma pe menarã. Pesẽ pehuvãitĩ.”

Umi 10 kuñataĩ opáy ha opu’ã, omyendy tuichave haguã ilampĩu. Umi 5 iñakã tavýva he’i umi 5 iñakã porãvape, “Peiporukápy oréve pende aséite michĩmi. Ore lampĩu niko ogue potáma hína.”

Umi iñakã porãva katu he’i chupekuéra, “Nahániri. Na ñande rupytypa mo’ãi niko péicharõ. Tapeho pejogua peipotárõ.” Ha umi 5 iñakã tavýva oho aja aséite rekávo, oguãhẽ pe menarã. Ha umi kuñataĩ iñakã porãva oike hendive mendahápe, ha oñemboty pe okẽ.

Ojevy rire umi aséite joguávo oho va’ekue, ojuhu ndikatuiha oike. Ha osapukái “Karai. Karai. Eipe’ána oréve ne rokẽ.” Ha’e katu he’i chupekuéra, “Mávaiko peẽ. Che ndapoikuaái.” Ha upéi osẽ he’i Jesús, “Pejesarekóke ha ani mo’ãke peke. Cháke ndapeikuaái hína araka’etépa ajúne.”

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE…

Upe oha’arõva niko iporãnte voi oguapy. Péva niko ipukuse jepi ñande hegui. Taha’e ñaha’arõ ramo ñande rapicha oútava, térã ñaha’arõ ramo mba’yru javiaha haguã. Mbyky ramo jepe pe jahasáva, ha’ete ku noguahẽ mo’ãiva voi upe ñaha’arõva.

Jesús okasea Ñandejára guahẽre. He’i ha’etaha peteĩ vy’a guasúicha. Ombojoja peteĩ ñemendáre oikótava peteĩ pyhare, ha ñande ñañekonvidaha jaike haguã upe vy’a guasúpe. Ndajaikuáante araka’etépa oguahẽta hína pe nóvio. Ikatu niko oguahẽ voi, ha ikatu avei oguahẽ pyhare pyte rasa rupi. Ha ñande ñaime vaerã ñaha’arõ ichupe jaike haguã hendive.

He’i ningo umi oha’arõva oreko va’erãha aséite omyendy haguã ilampíũ. Ha pe aséite ningo iporã heta mba’erã. Oĩ aséite oñemoĩva mákinakuérape omba’apo porã haguã, oĩ tembi’urã, ha jajepichy haguã jepe oĩ. Ha mba’ichaguátapa hína, che reindy ha nde che irũ, la aséite ñaikotevẽva ani haguã ogue la ñane lampíũ, ñaha’arõ aja ou ñane rendápe Kirito.

Oiménepa la ñande aséite ha’éta hina umi tembiapo porã, ñembo’e, poriahuvereko, ñepytyvõ, ñe’ẽ porã, mba’e rechakuaa, jajapóva ára ha pyhare ñande rapichápe. Mba’épa nde eremi.

Pa’i Jasy.