Ñahendu Jesús Ñe’ẽ. Viernes 29º Durante el Año

Escucha el evangelio y la reflexión en: https://youtu.be/vDwFX1sdfrQ

Viernes 29º Durante el Año

Lucas 12, 54 – 59

Upérõ Jesús he’i avei opavavépe: Pehechárõ arai opu’ãva kuarahy reike gotyo niko peje okytaha. Ha oky. Ha yvytu oipeju ramo nórte guio katu peje hakutaha. Ha haku. Mávape piko pembotavyse. Árare pemañávo niko peikuaáma mba’épa ojehúta. Mba’éicha hag̃ua piko ko’ág̃a ndapehecha kuaái mba’épa he’ise umi mba’e che ajapóva.

Peñeha’ãna peiporavo ha pejapo opa mba’e hendápe porã. Oimérõ he’íva nde rehe nerembiapo vaiha, eñeha’ã eñemoĩ porã hendive tapére, nde reraha mboyve karai juez rendápe. Cháke upeicha’ỹrõ, karai juez nde rejáne tahachi pópe, ha ha’ekuéra ne moingéne kárselpe. Ha upégui neresẽ mo’ãi epagapa mboyve, esoite peve.

Ñandejára Jesukrísto ñe’ẽ.

ÑAMBOGUEJY ÑANDE REKOVÉPE…

Ipochy ha oiko vaíva oñondive niko oñepyrũ jepi jeja’o, jesapukái ha ñe’ẽ apípe. Upégui ohasámane itie’ỹ ojupe. Ha mbykyetéma ohasa haguã ñorairõme. Péva ndopa porã mo’ãi hína. Oĩme voi oikéva pléitope, omoĩva abogado, ohóva polisíape, fiscalíape. Ha toĩke pláta, jeju ha jeho ára ha pyhare, oñeguahẽ meve karai juez renondépe. Ha’e ágã upéi, amo kane’õme ha heta ñande ruguy syry rire, he’i haguã mávapa upe ikáusava ha opaga vaerã térã katu oho va’erã kárselpe.

Upéva ningo ipohýi eterei ha naiporãi jaike umíchagua pléito pukúpe ikatúramo ñande ñamyesakã ivaíva ha ñamoĩ porã hendape’ỹva ñemongetápe porã ñande voi. Térã katu jaheka peteĩ tapicha jajeroviaha mokoĩvéva, ikatúva ñanepytỹvo ha ñanerenohẽ jevy tapépe.

Pe polisíape jereraha, ha fiscalíape ñehenói, ha juez renondépe ñañombojovake niko ijetu’u ha iñaka jagua. Ha umi rupi jaikéramo javorái kuápe jajasuru. Jaiko vai puku haguãma hina. Ha nañasẽ mo’ãi upégui ñanekarãi’ỹre heta ñuatĩ akua ha ñamombo mboyve heta pira pire. Ha upévaite ningo pe káso Jesús omombe’úva ñandéve. Jaiko vaíramo ñande rapicha ndive ñañemoĩ porã haguã jahakuévo tapére. Pe tape ha’e hina ñande rekove. Pe tape ha’e hina ko’ãga ikatúva jajapo.

Oiméramo jaiko vai ñande rapicha ndive, ko’ãga ñañeha’ã ñambovevúi ñane rembiapo vaikue ñaime aja oñondive. Ñañeha’ã ñañemongeta, ñañoperdona, ñamyesakã ojupe jajavyha, ha japyta py’a guapýpe.

Mba’épa ou nde py’ápe che irũ ha nde che reindy. Nemandu’ápa hína umi pléito ha jeiko vai nde rapichakuéra ndive, tekotevẽva emohenda ñemongeta porã rupive.

Jajerure Ñandejárape tombohape ñandéve umíva, ikatu haguãicha ñambovevúi jahávo ojupe ñande deveha.

Pa’i Jasy.