Ñahendu Hesu. Viernes 30º Durante el Año

Escucha el evangelio y la reflexión en: https://youtu.be/QuNobkkgDv4

Viernes 30º Durante el Año

Lucas 14, 1 – 6

Peteĩ pytu’uha árape, peteĩ fariséo okonvida Jesúspe oho hag̃ua osena hendive hógape. Opa umi oĩva upépe omaña joa hikuái Jesús rehe. Péicha háguinte, opu’ã sapy’a oñembo’y Jesús renondépe peteĩ karai ijyva ha hetyma umíva irurupáva. Jesús oporandu
umi Moisés léi ombo’évape ha umi fariséope:— Oĩ porãiko ñamonguera hasýva pytu’uha árape, térãpa nahániri.

Ha’ekuéra katu okirirĩmba chugui. Upémarõ, Jesús ojagarra ipógui pe karaípe, ha omonguera chupe. Upéi omondo chupe hógape. Umi fariséope he’i:— Pende ra’y térã pene rymba guéi ho’árõ yvy kuápe piko, ndapeho mo’ãi penohẽ pytu’uha ára ramo jepe. Ha ndoikuaái mba’épa he’íta hikuái chupe.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Oje’e niko upérupi ñande rapicha hasy katúramo terã ojedegrasia ramo, péva oikoha Ñandejára oipota haguére. Aipóramo niko nahembýi mba’eve jajapo.

Ñandejára oipotáramo piko mba’e ñande jajapóta. Mba’e ja’éta. Ñane pasiénciamante. Ñane ndive voi niko sapy’ánte hendy kavaju resa. Nde’iséi ha nosẽ porãi mba’eve. Ñañepysanga ha jaiko’i, ñande rasýma katu. Jajekupylia ha ja’a. Ha upéicha jave ñapensa: Mba’e mba’e piko ajapo ra’e ajeve péicha Ñandejára ombojere che rehe.

Ko’ãichagua ñe’ẽ ha idéa, ñane pytyvõ rangue oity ñande py’a yvýre. Oime ramo Ñandejára kastígo piko maerâ jajetyvyróta. La hembýva japyta ñañembyasy.

Hesu katu niko oikóva oipohano hasývape ohechauka haguã Ñandejára mborayhu. Ha ñanembo’e haguã avei upe tapicha oikotevẽva oĩva ñane renondépe ha’eha Ñandejára voi ñane renóiva. Ha ndaikatúi ñande ja’e chupe: Ñandejára ko oipota péicha repyta, oiméramo ñande pópe ñaipytyvõ haguã, jaheka hendive mba’éichapa ikatu ha’e ijehegui osẽ upe oime hágui, térã ombovevúi imi jepe ra’e imba’asy.

Hesu ohechauka Ñandejára oipotaha ta’ýra ha tajýrakuéra isãso ha oñakarapu’ã. Tahesãi, tojerovia, tovy’ã. Ichupe guarã ndaijái jaiporu Ñandejára réra, térã Ñandejára léi, ja’e haguã “péichante va’erã voi”, jaheja haguã péichante umi ombohasa asýva ñande rapicha, térã ñane mbohasa asýva ñandéve voi. Ha péicha, nde che reindy ha che irũ, Hesu peguarã pe Ñandejára léi tuichavéva ha’e hína pe ñande rapicha, ha ñande voi, tajaikove, jajejopy vai’ỹre, ñaneapytĩ’ỹre mba’eveichagua sã. Tajaiko porã.

Pa’i Jasy.