Ñahendu Jesús Ñe’ẽ. 1 noviembre: Sántokuéra ára

Escucha el evangelio y la reflexión en: https://youtu.be/AUvluPW-_Ts

1 noviembre: Sántokuéra ára Mateo 4, 25 – 5, 12

Upérõ katu hetáma sapy’a ohóvo umi oikóva Jesús rapykuéri oúva Galiléagui, Decápolis, Jerusalén, Judea ha Jordán mboypýri guive.

Jesús ohechávo hetaha umi ijatýva, ojupi peteĩ sérro akãme ha oguapy oñe’ẽ hag̃ua. Idisípulokuéra oñembyaty ijerére, ha Jesús oñepyrũ ombo’e chupekuéra. “Ovy’a vaerã umi ohecha kuaáva imboriahuha, chupekuéra g̃uarã niko hína Ñandejára Rréino.

Ovy’a vaerã umi ohasa asýva, Ñandejára voi omyangapyhýta chupekuéra. Ovy’a va’erã umi heko mirĩva, Ñandejára ome’ẽta chupekuéra yvy imba’e teerã. Ovy’a va’erã umi Ñandejára rembipotánte ojaposéva, ha’e voi ome’ẽta chupekuéra opa oikotevẽva. Ovy’a va’erã umi oiporiahuverekóva hapichápe, Ñandejára oiporiahuverekóta chupekuéra.

Ovy’a va’erã umi ipy’a potĩva, ha’ekuéra ohechátagui Ñandejárape. Ovy’a va’erã umi oñeha’ãva oporomoingo py’aguapýpe, Ñandejára oguerekóta chupekuéra ita’ýra ha itajýra ramo. Ovy’a va’erã umi ohasa asýva Ñandejára rembipota ojapógui, chupe kuéra g̃uarã niko
hína Ñandejára Rréino yvagapegua.

Pevy’a vaerã pejeja’o ha peñemuña ramo, ha oje’e ramo pende rehe opa mba’e vai, che ndive peiko haguére. Pevy’áke ha tapende py’a rory, tuicha mba’e niko oñeme’ẽta peẽme yvágape. Peẽicha avei, profétakuéra ohasa asy vaekue yma.”

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Heta oĩ ñane sántokuéra, ñande ryke’y ha ñane reindy guasu ñahenóiva ñembo’épe, ñamyataindýva nichomíme, jahecháva tupao altárpe yvate. Ha umíva niko upépe ojehupi ñanemandu’ávo hekovére, ñanepytyvõ haguã ñande rapépe. Upéva jepe nde’iséi hína ha’ekueranteha umi imarangatúva.

Hetaiteve oime ñande rapicha ñandéichagua naiñakãngoráiva. Ára ha ára ojekytýva ñande rehe ohasakuévo, ojupíva colectivo pe, oguapýva ñande ykére. Ñande jaikuaa’ỹre oñeha’ãva omboguata ijerovia, ombo’éva mitã ha kakuaápe ñembo’e, oipytyvõva mboriahúpe, oiporiahuverekóva hapicha, omoirũva hasývape.

Ogueropu’akáva ñembohory, jeapo’i ha jepuka oiko haguére tupao rupi, omoherakuã haguére Ñandejára ñe’ẽ, ha ndojehejáiva upéichaverõ.

He’i niko Papa Francisco: “Avy’a ahechávo pe teko marangatu Ñandejára puéblo apytépe: túva ha sykuéra omongakuaáva mborayhu pópe ifamília, kuña ha kuimba’e omba’apóva omongaru haguã ára ko’ẽre imitãnguéra, umi hasýva, umi hermána guaiguĩmi opukavýva gueteri… Umi tapicha marangatu oĩva ñande róga rokẽ ykére ohechauka ñandéve Ñandejára oimeha ñande apytépe”. Reikuaápa nde ave che irũ ha che reindy, oikóva nde róga jerére, imba’e porã ha imarangatúgui ikatúva ja’e hese sánto térã sánta.

Pa’i Jasy.