Ñahendu Hesu. Viernes 32º Durante el Año

Escucha el evangelio y la reflexión en: https://youtu.be/vvlEmIJXI9Q

Viernes 32º Durante el Año

Lucas 17, 26 – 37

Upérõ Jesús he’i idisípulokuérape: Ág̃a Che, kuimba’éicha aju vaekue, aju jey vove, niko yvyporakuéra oikóta ku Noé oikovérõ guaréicha. Umíva umi árape niko umi héntekuéra oiko okaru, omokõ ha omenda hamba’e. Upéi katu Noé ojupi hi’árkape ha ou ama guasu. Opa opytáva, omano. Upéicha vaekue avei niko Lot oikovérõ guare.

Opa umi Sodoma ha Gomorragua oiko okaru ha omokõvo, oĩ oñemúva, oñemitỹva ha ojogapóva hamba’e. Upéi katu Lot osẽ Sodómagui, ha tata ha asúfre mante oguarara hi’arikuéra.

Omanomba hikuái. Péichata hína ág̃a Che, kuimba’éicha aju vaekue, aju jey vove. Upéva upe árape, oimérõ hína oĩva óga ári, ani mo’ãke oguejy ha oike hógape onohẽ hag̃ua mba’eve. Ha ñúme mba’e oimérõ, aníke ojevy hógape. Pene mandu’áke mba’épa ojehu va’ekue Lot rembirekópe. Umi hekovére hakate’ỹva, omanóta. Ha umi omanóva katu, ojesalváta.

Upe pyhare che aju vove, mokõi okéne ojopohéi tupápe. Peteĩ ojereraháne ha pe ambue katu opytáne. Mokõi kuña oñembisóne hína oñondive. Peteĩ ojereraháne ha pe ambue katu opytáne.

Upépe idisípulokuéra osẽ oporandu chupe: — Mbo’ehára, moõiko ojehúta ko’ã mba’e.

Jesús he’i chupekuéra: — Te’õngue oĩhámente niko ijatýva yryvu.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Jaháramo tapére ha jahecha yryvu yvate oveve jere joáva oguejývo peteĩ hendápe, katuete upérupi oiméne te’õngue. Jahasáramo ijypy rupi katu ñahetũ ipyti’u ha ine. Natekotevẽi ñañembojaite. Mombyrýgui ikatúma jaikuaa mba’épa oiméta. Ha upéva Hesu he’i umi oikuaasévape mba’éichapa oikuaáta Ñandejára ou aguĩmaha.

Ikatu niko japilla mombyrýgui umi mba’e ñande reraha vai ha ndopa porã mo’ãiva. Ñandejára oñanduka ñandéve mombyrymi guive umi tekotevẽva ñamyatyrõ, jaju mboyve ja’a paite yryvu jurúpe.

Upéva oiko va’ekue Noe tiémpope. Pe y okakuaárõ guare, ojaho’i ha ohundipa henteta yvy apére. Noe niko he’i porã ichupe kuéra. Avei Lot oikóramo Sodómape, he’i umi upépe oikóvape oheja haguã heko ky’a, oñemboja haguã Ñandejárare. Ha’e kuéra katu ndoikuaaséi. Ndohejái iguata karẽ oguahẽmeve ikatu’ỹve hápe orremedia.

Ñama’ẽ ñande avei, che irũ ha che reindy. Mba’épa upe Ñandejára ohechaukáva ñandéve hína ko’ãga. Ani ñaha’arõ ituju ha ipyti’u jepe ñande hegui ñande rekovemi.

Pa’i Jasy.