Ñahendu Hesu. Viernes Feria de Adviento

Escucha el evangelio y la reflexión en: https://youtu.be/Rm7Nh3yyMBc

18 de diciembre: Feria de Adviento

Mateo 1, 18-24

Jesucristo oúramo guare kóicha vaekue: Isy María ome’ẽma iñe’ẽ omenda haguã Josére. Ha oiko mboyve oñondive, María ojejuhu hye guasuha Espíritu Santo rupi. José katu, kuimba’e ijohei pyréva, nomoherakuã vaiséi chupe.

Oheja reise mo’ãnte chupe, avave oikuaa’ỹre. Ko’ã mba’e ombojere aja iñakãme, ojehechauka chupe iképe peteĩ Ángel, ha he’i chupe: José, David ñemoñare, ani rekyhyje reraha haguã ne rembirekorã Maríape. Pe mitã ha’e oguerekótava niko Espíritu Santo pu’aka rupi ou. María imembýta ha rembohérata pe mitã Jesús. Ha’e hína osalváta tetã Israel.

Ko’ã mba’e ojehu oiko haguã hekoitépe upe Ñandejára he’iva’ekue proféta rupi: “Kuñataĩ imarã’ỹva hye guasúta ha imemby kuimba’éta. Oñembohérata Emanuel, he’iséva “Tupã oĩ ñane ndive”.

José opáyvo, ojapo pe Ángel he’i haguéicha chupe, ha ogueraha María hógape
hembirekorã.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Ha ñama’ẽmína ko káso kóva oikóramo guáicha ñane retãme. Mba’épa oiko va’erã mo’ã peteĩ kuña omenda potáva peteĩ kuimba’e ndive ha oúramo ñande rapicha ohecha pe hembirekorã ipuru’ã kakuaa hina ha’e oiko’ỹre hendive.

Péva ningo ndopa porã mo’ãi hína. Peteĩ kuimba’e niko ndohejarei mo’ãi peteĩ kuñáme omoakãratĩva chupe. Ágã katu pe kuimba’e omoakãratĩ ramo hembirekópe, “péa péichante vaerã voi”, arriéro pórtepe, “kuimba’ére ndojái mba’eve”, he’i lo mitã.

Umi judío kuéra niko péicha avei raka’e ha pe kuña péicha ojapóva iménarãre ikatu voi
oñembo’ita ojejukápeve.

Vaípe niko ojecha mitã José ojuhúvo hembirekorã María tuichaitemaha ha ha’e katu ndoikuaái mba’eve. Alónso rupápe ombo’áramo guáicha guyraũ. Oiméne ko ñande
rapicha heta iñangekói ha ohasa asy, oñembyasy ha ndoikuaái mba’épa ojapóta
nombyaiséigui Maríape.

Ha péicha ombojere aja iñakãme ojechauka chupe iképe mba’épa ojapo va’erã: Ñandejára ojerure chupe omoguahẽ haguã Maríape hógape, ha omenda haguã hese, ha omongakuaa haguã pe mitã ita’ýra ramo guáicha. San José iñe’ẽ rendu Ñandejárape, ijetu’úramo jepe upe ojeruréva chupe. Omboyke pe hemiandu ha ojerovia.

Ñama’ẽmína che irũ ha nde che reindy mba’eichaitépa José oñemosã ha oguata mokõi rriéndare. Peteĩva ha’e pe mborayhu, ohayhu añete hembireko Maríape, ha ambue katu ha’e pe jerovia, iñe’ẽ rendu Ñandejárape. Ha ndépa mba’eteko reñandumi hína umi nde rekove sã.

Pa’i Jasy.