Ñahendu Hesu. Viernes Semana 28ª TO

Escucha el evangelio y la reflexión en: https://youtu.be/e08yEJPAilQ

Viernes 28ª TO

Lucas 12, 1 –7

Heta niko upérõ umi ojerepáva Jesús rehe, ha oñomyañamba hikuái. Jesús he’i idisípulokuérape:

Peñeñangarekóke umi fariséo rova mokõigui. Cháke tuicha pene mbotavýne.
Ndaipóri niko mba’eve oñemíva hína, ojehecha’ỹ vaerã. Ha ndaipóri mba’eve okañýva,
ojekuaa’ỹ vaerã. Upévare, opa mba’e peẽ pejéva pytũháme, oñehendúne ára sakãme. Ha
umi mba’e pejéva koty ñembotypýpe katu opavavete oúne ohendu ha oikuaa.

Che irũ nguéra, ani pekyhyje avavégui. Oime vaerã niko umi ikatúva pende rekove oipe’a pende hegui. Upéi katu, mba’evéma ndaikatúi ojapo pende rehe. Ta’e peẽme mávaguipa pekyhyje vaerã. Pekyhyje Ñandejáragui. Ha’e ikatu oipe’a pende hegui pende rekove, ha upéi ave, pene mondo kuaa Aña retãme. Chugui pekyhyje va’erã.

Ndojejoguái nga’u piko 5 guyra’i níkel mbovymíre. Péicharõ jepe, Ñandejára ndahesaráiri chugui kuéra. Péichante avei peẽ. Pene akãrague peteĩ-teĩ jepe niko Ñandejára oikuaa. Ani aipo ramo pekyhyje avavégui. Peẽ niko tuichaiteve mba’e hína guyra’ikuéragui.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

He’íva ningo ñe’ẽ: “Arrivéño ha tóro mócho igólpe mante ñañandu”. Ha upéva ningo oje’éva jepi umi tapicha ndajaikuáaiva mba’eichaguáva oúramo oike ñande apytépe, ñande vállepe, térã ñande rógape. Kañy hápe ha pytũmbýpe ojapóva ohóvo iñuhã, ha amo ipahápentema ñañandu mamópa ombeti, ñande reity ha osarambi apo ñande rehe.

Ha péva ningo upe Hesu he’íva ijapóstol kuérape oñeñangareko haguã Heróde ha umi fariséokuéragui, ndaha’éiva hína pohã ro’ysã ha iñensuguýva. Ijapéguio ha’ekuérantema la isantuláriova, itupao rayhúva, omyakãva ñembo’e hamba’e. Ha ikupéguio katu oha’ãva chupekuéra ipy ha ipópe, oity haguã Hesu ha iñirũnguérape iñuhãme.

Péva pe tova mokõi oiméva avei umi tapicha ojeroviáva Ñandejára rehe apytépe, ha tupao ryepýpe avei, he’i Hesu, peteĩ levadúra vai oúva upéi ombyaipa pe komunida.

Ñande apéguio jahechaukáva ha ñande juru rupi ja’éva ndaha’eiete upe ñande rekovépe
jajapóva. Ótro ladoite ojapi. Heta vése niko oñeñomi mba’e hendape’ỹ oikóva ñande Iglésia apytépe, jakyhyjégui, nañamongy’aséigui ñande tupao réra hamba’e. Hesu katu he’i ndaipóri vaerãha mba’e ñemi hendape’ỹ ñañongatu ha jaguerokirirĩva. Ha umi tembiapo vai ñemihãme oĩva ojekuaapa vaerãha amo ipahápe.

Ani jakyhyje, he’i Hesu, ja’e haguã añeteguáva. Ikatu oime ipochýva ñanendive ha ñandeperseguíva. Ñandejára katu, oñangarekóva guyra’íre jepe, nañandereja rei mo’ãi,
he’i Hesu. Ichugui jakyhyjeve vaerã ha ani ñañomi ñande avei añeteguáva ha ñamo’ã
mo’ã aña rembiapokue.

Pa’i Jasy.