Ñahendu Jesús. San Bla ára

Escucha el evangelio y la reflexión en: https://youtu.be/QSLHqRSj-gI

3 febrero: San Bla ára Marcos 16, 15-20

Upérõ Jesús ojechauka umi 11 apóstolkuérape, ha he’i chupekuéra: Tapeho opa rupi ko yvy apére ha pehenduka opavavépe ko marandu porã. Umi ogueroviáva ha oñemongaraíva ojesalváta. Umi oguerovia’ỹva katu oñehundíta.

Umi che rehe ojeroviáva heta milágro ojapóne. Che rérape omosẽne hikuái demóño ha oñe’ẽne ñe’ẽ oñeñe’ẽ’ỹvape ha ipyahúva chupekuéra. Ipópe ojagarráne mbói térã ho’u ramo venéno ndojehúi chéne chupe kuéra mba’eve. Omoĩne ipo hasývare ha umíva okueráne.

Jesús oñe’ẽmba rire idisípulokuéra ndive, Tupã ohupi chupe yvágape. Upépe oguapy ha’e Tupã ykére. Idisípulokuéra katu osẽ omombe’u pe ohasa vaekue oparupiete. Ha Ñandejára oipytyvõ manté chupekuéra. Umi milágro ojapóva rupi ojehecha añeteha umi mba’e ha’e kuéra he’íva.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ko árape ñanemandu’a hína San Blas rehe, ha’éva ñane retã Paraguái sánto patróno. Ha’e niko médico vale raka’e, oipohanóva heta hénte ha avei oipohano animal hasývape jepe. Onase va’ekue tetã Armenia pe, ko’ãga oñehenóiva tetã Turquía pe. Túrko raka’e la ñande patrono San Blas aipóramo. Ha ojejuka raka’e áño 311 pe, oñohẽvo huguy Ñandejára rayhupápe.

Ha la San Blas niko pa’i vaekue. Ha oiko vaekue ndaje raka’e ha’eño peteĩ itakuápe oĩva peteĩ sérro yvatépe. Upe ka’aguýpe ha’e oñembo’éva Ñandejárape. Oñemitỹ okaru haguã ha ohómiva hendápe oheka ichupe umi hasýva oñepohãno haguã, ha heta hénte ohekáva jehovasa ha ohenduséva ichupe. Ha oje’e avei umi mymba ka’aguy hasýva ohoha avei hendápe San Blas oipohano ha omongaru
haguã ichupe kuéra. Ha upéi ningo ojeporavóramo guare oiko haguã ichugui obíspo, ha’e opytánte upe itakua oiko hápe. Ha upe guivénte ha’e oservi hapicha kuérape Ñandejára Iglésiape oguatáva.

Ha upe año 311 jave ningo umi cristianokuéra mbarete oñemuña, ojeapresa ha ojejuka voi cristiano haguérente. Ha opilla raka’e umi romano ichupe ha oapresa voi. Ha oraha jave ichupe ojejuka haguãme ndaje raka’e ohenonde’a ichupekuéra peteĩ kuñakaraimi, hesay hováre, ogueru imemby omano mbotáva peteĩ pira ratĩ akua opa’ãva ijahy’ópe. Ha upepete ndaje opyta San Bla oipe’a voi pe pira ratĩ ijahy’ógui ha oipichývo, pe mitã ogueru jey ipytu ha okueraite. Ha upévare ningo pe San Bla árape oñemoĩ ñande ahy’ópe mokõi tataindy ojuasáva. Ha oiméramo ijahy’o pa’ãva térã ipytuhóva, jaipete pete jepi ilómo ja’évo San Blas, San Blas.

Ñanemandu’ávo hese ko árape che reindy ha nde che irũ, ñapensami mba’éichapa ikatu ñañangareko porãve ka’aguy ha mymba saite kuérare. Ani opa ñande hegui. Avei ñama’ẽ mba’éichapa ikatu ñañeha’ã umi hasýva oñeñangareko porãve haguã. Ani ja’e gua’u San Blas la ñande patrono ha ñahundipa ka’aguy, jajukapa mymba, ha ñande rasypa.

Pa’i Alberto Luna.