Ñahendu Hesu. Domingo 5º Tiempo Ordinario

Escucha el evangelio y la reflexión en: https://youtu.be/sv5UWTWOLco

Domingo 5º Tiempo Ordinario

San Marcos 1, 29 – 39

Upe ramo Jesús oho Santiago ha Juan ndive, Simón ha Andrés rógape. Simón rembireko sy iñakãnundu ha oĩ hupápe. Jesús ohendu upéva, oñemboja ha ipojáivo ipóre omopu’ã chupe. Upévo opi iñakãnundu ha oñemoĩ ohecha mba’épa ha’ekuéra oikotevẽ.

Ka’aruete, oikévo kuarahy, ogueraha hikuái Jesús rendápe opa hasýva ha ipajéva, ha opa tavagua oñembyaty hokẽnguera renondépe, heta hasývape opaichagua mba’asýgui Jesús omonguera ha omosẽ heta aña. Ha ndohejái chupekuéra oñe’ẽ, ha’ekuéra oikuaágui
chupe.

Ko’ẽ mboyve Jesús opu’ã ha osẽ pe távagui, ha oho ha’eñoháme oñembo’e haguã.
Simón ha iñirũnguéra oho Jesús píari, ha ojuhúvo he’i chupe: Opavave nde reka. Jesús katu he’i chupekuéra: Jaha umi hi’aguĩha rupi. Umi rupi avei tekotevẽ amyasãi che ñe’ẽ, upevarã niko asẽ va’ekue.

Ha upéicha Jesús oiko Galiléa rupi omombe’úvo iñe’ẽ umi tupao rupi, ha omosẽvo añanguéra.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Sapy’ánteko ikatu ñande ñande ka’avose. Jaikose ojehayhu ha oñembojeroviávaramo. Ñambyatyse heta hetave ñande jerére, ojepopetepáva ñandéve.

Jahecha Hesu ohóvo Simón rógape ojuhu Pedro rembireko sy iñakãnundúva. Ha oñembo’évo hese, oipohano. Ha sapy’aitépe hetaitereivéma ijaty hasýva oúva hendápe. Ha’e oñembo’e avei hesekuéra ha hetápe oipohano. Upéi katu osẽ pe hente eta apytégui.

Oho ha’eño oñembo’e. Upe jave katu ijatyvéntema oporandúva hese. Ha apóstolkuéra oho oheka ichupe. Ovy’a hikuái. Imaétro kuéra ombyaty heta hénte py. Oimo’ã hikuái Hesu ovy’áta avei opavave oheka haguére ichupe. Hesu katu he’i osẽ haguã hikuái upégui. Oho haguã umi hesaitéva rendápe, umi nohendúiva gueteri iñe’ẽ rendápe.

Jahecha hína che reindy ha nde che irũ Hesu ndokeiha aguara pire ári. Ndopytái heta ijatyhápe, oñeguerochichĩ ha oñemomba’e guasu hápe. Ha’e osẽ oheka umi oikotevẽvévape, umi oñembotapykuéva jepi, umi imboriahuvévape, oríllare oikóvare.

ÑAÑEMBO’E OÑONDIVE

Ñandejára Hesukrísto reju va’ekue ore pohãnóvo ore mba’asýgui, ha emboguévo ore korasõgui Aña rapykuere. Rojerure ndéve ore avei roiko haguã ndéicha rohekávo umi oikotevẽ ha itapykuévape, romoguahẽ haguã ichupekuéra ne ñe’ẽ marangatu. Amén.

Pa’i Alberto Luna.