Ñahendu Jesús. Domingo 6º Tiempo Ordinario

Escucha el evangelio y la reflexión en: https://youtu.be/fbFlpPsjOzs

Domingo 6º Tiempo Ordinario

Marcos 1, 40-45

Upe ramo Peteĩ lepróso oñemboja Jesús rehe ha ñesũháme he’i chupe: Nde reipotárõ che mongueráne che mba’asýgui.

Jesús oiporiahuvereko chupe. Opoko hese ha he’i chupe: Aipota. Ekuera!

Upe vove ojei chugui umi kuru vai, ha okuera. Jesús he’i chupe oho haguã ha he’i jevy chupe: Aníke emombe’u avavépe. Terehónte ejechauka pa’ípe, ha eikuave’ẽ Ñandejárape umi mba’e Moisés he’iva’ekue oñekuave’ẽ va’erãha, ojehecha haguã rekueramaha.

Pe kuimba’e katu oho ha omombe’u opa rupi upe ojehuva’ekue. Upévare Jesús ndaikatu véima oike umi puéblope, umi okahárente opyta. Ha opa guio oime oúva hendápe.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ymave ningo umi leprósogui ojekyhyje ha ndojepokói voi hesekuéra. Ojejeguaru voi ichuguikuéra ikuru vaígui. Ymave ojereraha ichupekuéra mombyry ha oñemombo upépe ytýicha. Oime hína peteĩ henda ojererahámiva umi lepróso ojeheja.

Péva hína Leprocomio Santa Isabel, amo Sapukái rire, sérro kupépe okañy. Mombyry. Jesús tiémpope avei umi lepróso opyta va’erã mombyry umi hénte oiko hágui.

Oiko umi desiertoha rupi ha avave ndojái va’erã hesekuéra. Ha ojehechávo ou hína ojediparapa. Ndaipóri opytáva opoko térã oñe’ẽ mba’e ichupekuéra. Hesu katu oheja pe lepróso oñemboja hese ha oñe’ẽ hendive, ohendu ichupe.

Oñandu pe tapicha ojeroviaha hese ha ojerure asyha omonguera haguã ichupe, oipotárõ. Hesu ombyasy ñande rapicha péicha ojerekoha. Ojediparapa ichugui mbói ramo guáicha. Ha’e katu oñemboja ha opokóvo hese omonguera. Ikatu haguãicha oiko jey opavave apytépe.

Mávapa umi ñande rapicha ko’ãgagua ojererekóva pe leprósoicha. Ojekyhyjéva ichugui. Mávapa umi ndojehejáiva voi oñemboja ñande rehe. Umi jajere ha ñakañýva ichuguikuéra.

Mávapa umi jajeguarúva ha ndajahejáiva oja ha opoko ñande rehe. Mba’épa che reindy ha nde che irũ, reñandu pe Hesu ñanembo’éva ohejávo upe lepróso oñemboja hese, ohendúvo ichupe ha ha’e voi opokóvo hese.

ÑAÑEMBO’E OÑONDIVE

Ñandejára Hesukrísto, reju va’ekue eheka umi itapykue ha oñemboykéva, ehechaukávo Ñandejára ndoipotaiha avave hemby ha oñembotapykue.

Orejokuái roho haguã umi ore rapicha oñemboyke ha avave ndohayhúiva rendápe, roñanduka haguã ichupekuéra ne mborayhu. Amén.

Pa’i Alberto Luna.