Ñahendu Jesús. Lunes 6º Tiempo Durante el Año

Escucha el evangelio y la reflexión en: https://youtu.be/uxD-zsiB8D4?si=QEBg-7uoZLb8qsiG

Lunes 6º Tiempo Ordinario. Marcos 8, 11 – 13

Upérõ umi fariséokuéra oguãhẽ Jesús oĩháme, ha oñepyrũ oñoñe’ẽ api hikuái. Ha ombopakova pireségui chupe hikuái, ojerure Jesúspe ojapo haguã chupekuéra peteĩ milágro. Péicharõ gua’úko oikuaáta hikuái Ñandejárapa ra’e pe omboúva Jesúspe.

Jesús katu ogueraha ipytu, ha ojere he’i: — Peẽ niko milágronte pejerure. Añete ha’e peẽme, ndajapo mo’ãi peẽme mba’eveichagua milágro. Ha Jesús osẽ oheja chupe kuéra. Ojupi kanóape ha ohasa lágo mboypýri.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Heta niko oĩ ojeroviáva Ñandejárare, ndaha’éiramo jepe católico. Oime heta religión ha heta tupao. Ñande ypykuekuéra guaraní jepe ha umi indígenakuéra ñane retãme oiméva, España ou mboyve ymaite ogueru religión católica, orekóma voi raka’e hikuái itupã ha mba’éichapa oñembo’e. Ha péicha avei cristianokuéra apytépe, jajeroviáva Jesucristo rehe ha jaiporúva Ñandejára ñe’ẽ, ñande Biblia, ñaime hetaichagua iglesia. Católico, evangélico, creyente oje’éva, bautísta, menonita, Asamblea de Dios, oĩ ortodoxo, anglicano, luterano, pentecostal ha mba’e.

Ko yvy tuichakue niko oĩ avei cristiano kuéra javeve heta religión guasu. Oime judíokuéra, musulmÁn, oime avei budista, oime hinduista. Ha hetave orekóva iñembo’e, itupao ha ikuatia omoñe’ẽva Tupãme.

Ñama’ẽ porãramo niko ndaikatúi Ñandejára rérape jaiko vai, ñañorairõ ha ñapu’ã ojuehe. Ñandejára niko ñandejokuái ñañeha’ãvo jaiko py’aguapýpe. Mba’éicha piko aipóramo opa oiméta ojojukáva Tupã rérape. Ñambojapu niko Ñandejárape péicha jaiko vaíramo.

Jesús ohecha ouha umi fariséo hendápe omoĩvo pakova pire oity haguã chupe, jahecha mávapa imilagrove, mávapa ihénte hetave. Jesús ndoikéi pe tape po’ípe. Ojehejaite mandi voi chugui kuéra, ha osẽ oho upégui.

Ikatu avei ñande che reindy ha nde che irũ sapy’ánte jaiporu ñande religión ñande rapicha lómore jakopi haguã. Ñandejára rérape niko naiporãi jajoguerosapukái ha ñanetie’ỹ ojupe. Iporãve va’erã niko jaiporu respeto ñane ambuéramo jepe.

Ñañomongeta porã ha ñañeha’ã jaiko py’aguapýpe oñondive. Mba’épa nde reñandu.

Pa’i Alberto Luna.