Ñahendu Hesu Ñe’ê. Miércoles de Ceniza

Escucha el evangelio y la reflexión en: https://youtu.be/s_Qz2Wq4G9g

Tanimbu ára. Miércoles de ceniza. Mateo 6, 1-6. 16-18.

Jesús he’i idisípulokuérape: Pejapo ramo oimeraẽ mba’e pemomba’e guasu haguã Ñandejárape, ani pejapótei opavave rovake pejechauka haguã. Péicha pejapórõ,
pende Ru yvagapegua nomyengovia mo’ãi peẽme mba’eve. Pévare, peipytyvõrõ
oikotevẽvape, ani pemyerakuã opa rupi ojapoháicha umi hova mokõiva, tupaópe térã
okápe. Ha’e kuéra niko péicha ojapo oñeñe’ẽ porã haguãnte hesekuéra.

Añete ha’epeẽme, chupekuéra niko oñemyengoviapáma voi pe oñemyengovia vaerã. Peipytyvõ ramo oikotevẽvape, ani peheja oikuaa pende rapicha pehayhuvévante jepe.
Kirirĩhámente pejapo. Ha péicha, pende Ru ohecháva upe kirirĩháme pejapóva,
omyengoviáta peẽme pene rembiapokue.

Peñembo’e jave, ani peñembo’e umi hova mokõivaicha. Umíva niko oñembo’y joa oñembo’e haguã, taha’e tupaópe térã umi okáre, ojehechauka haguãnte opavavépe.

Añete ha’e peẽme, chupe kuéra niko oñemyengoviapáma pe oñemyengovia va’erã.
Peñembo’éta vove katu, peike pende kotýpe, pemboty pene rokẽ, ha pene año peñembo’e pende Rúpe. Ha pende Ru ohecháva mba’épa pejapo pene añoháme, omyengoviáta peẽme pene rembiapokue.

Pejapo jave ajúno, ani peñembohovasy gua’u umi hova mokõivaicha. Umíva niko péicha ojapo ohechauka haguãnte o’ajunaha hína. Añete ha’e peẽme, chupekuéra niko oñemyengoviapáma voi pe oñemyengovia vaerã. Pe’ajuna jave katu, pejovahéi ha peñakãkarãi, ani haguã avave ohecha kuaa pe’ajunaha hína. Nde Ru añónte ohecháta pe ne añoháme rejapóva. Ha’e ohecha kuaáta ndéve ha omyengoviáta ndéve ne rembiapokue.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oĩ niko ñande rapicha ojehechaukase etereíva voi, oipotáva oñehenói héra aty
guasu hápe, tojepopetéke chupe opavave, tosẽke ha’e fótope, mba’e guasúicha
omombe’u opa ojapóva, ha’éntema voi la yvoty. Ha ome’ẽramo tupaópe térã mitã
mboriahúpe, oipota osẽ télepe ojehecha haguã imba’e porãha. Hesu he’i umíva
ndojapoiha umi mba’e Ñandejára térã hapicha rayhupápe, ojapo ojehechaukaséguinte,
upévante oheka, ha upépe opyta.

Ani aipo ramo che irũ ha che reindy ja’a pe aña ñuhãme. Ani jaiko jaguerosapukái ryguasu kokore ombo’a ramóvaicha upe jajapóva. Ñañembo’éramo, térã jajapóramo ajúno Ñandejárante tañanderecha ha tañanerendu, ha ñame’ẽramo ñande rapicha oikotevẽvape ha’énte toikuaa. Upéicha jajapóramo tuicha Tupã omyengoviata ñandéve, he’i Hesu.

Pa’i Alberto Luna.