Ñahendu Jesús. 29 diciembre: Día V dentro de la Octava de Navidad

Escucha el evangelio y la reflexión en: https://youtu.be/CKVGcrZNJq4

29 diciembre: Día V dentro de la Octava de Navidad

Lucas 2, 22 – 35.

Ha ohasávo 40 ára Jesús onase hague, ogueraha hikuái pe mitã Jerusalénpe, ha omoĩ Ñandejára renondépe. Péicha ojapo hikuái Ñandejára mandamiénto he’ígui: “Opa mitã kuimba’e ypykue oñemboyke vaerã Ñandejárape guarã”. Ñandejára mandamiénto he’i ave,
ogueraha vaerãha hikuái, ofrendarã, mokõi pykasu ỹrõ katu mokõi jeruti ra’y.

Umiha árape niko oiko vaekue Jerusalénpe Simeón, karai marangatu. Oha’arõva oikóvo Ñandejára osalva haguã Israélpe. Ha Espíritu Santo oĩ hendive, ha oikuaauka ra’e chupe nomano mo’ãiha ohecha mboyve pe Mesías, Ñandejára he’i vaekue omboutaha. Ha Espíritu Santo ogueraha Simeónpe tupaópe.

Ha María ha José oikévo tupaópe pe mitã reheve, okumpli haguã Ñandejára mandamiénto, Simeón ohupi pe mitã ijyva ári ha omomba’e guasu Ñandejárape kóicha: Ko’ágã, Ñandejára, rejapóma ne ñe’ẽ. Ikatúma che reja amano py’a guapýpe.

Che resa teépe niko ahecha ko rejapóva ne retã resalva haguã. Ha opa tetã ohecháne avei.

Ko mba’e rendy ohesapétava niko opa tetãme guarã, ha ombotuicháta ne retã Israel.

José ha María opyta ijurujái ohendúvo umi mba’e Simeón he’íva pe mitãre. Upéi Simeón ohovasa chupe kuéra, ha he’i Maríape: — Peikuaáke kóva ko mitã ouha oity haguã heta Israelguápe. Péicha ave, hetápe omopu’ã va’erã ágã. Ha’e niko peteĩ mba’e rechaukaháta
hína, ha heta oĩta ojahéiva hese. Ha ndéve María, hasýta ku kysépe rejekutúrõ guáicha ne korasõme. Ko’ã mba’e ohechaukáta mba’e-mba’épa oĩ hína géntekuéra akãme.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Navidad há año nuevo aretépe ningo oime okaru guasu ha hembypáva imesápe há oime katu okaru pokã ha sa’imínte ohupytýva. Ha umi ára pyharépe ave oime ijao pyahu mimbipáva ha oime katu pe kokuehe guaremínte ojohéi ha omonde jeýva. Ha péina jahecha Señor San José, Tupãsy ha pe Niño oho tupaópe ha upépe oraha hikuái mokõi jeruti, upéva hína umi mboriahu oraháva. Umi poguasu niko oraha ovecha, vaka ra’y, guéi jepe oiméne oraháva tupaópe.

Ha ou hendápe kuéra karai Simeón. Ñandejára Espíritu oñatõi ichupe. Ohupi voi pe mitã ha omoñe’ẽmba, ohechakuaa pype ha’eha Tupã Ñandejára remimbou. Imboriahúramo jepe isy ha itúva, Simeón oñandu upe salvación ouha umíva umi mboriahumígui ha Ñandejára oĩha hendivekuéra.

Ehechápa che reindy ha nde che irũ mba’éichapa Ñandejára ojevale avei ko’ã ñande rukuéra, oñehenóiva tercera edad rehe, ha mba’éichapa ñande ave ikatu jaikuaa ichuguikuéra heta mba’e porã.

Pa’i Jasy.