Ñahendu Jesús. María Iglesia sy

Escucha el evangelio y la reflexión en: https://youtu.be/CFpKj0Cx_rw

María Iglesia sy Juan 19, 25-27

Jesús kurusu ypýpe oĩ hína isy María, ha itia María ku Cleofás rembireko, ha María Magdaléna ave. Jesús ohechávo isýpe ha ijykére oĩha hína pe idisípulo ha’e ohayhúva.

He’i isýpe: — Péina upépe ne memby.

Upéi he’i idisípulope: — Péina upépe nde sy.

Upe guive, pe Jesús disípulo ogueraha Maríape hendive hógape.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oime niko ñande rapicha jajepokuaa itereiha, ha jahayhúva, ndaha’éi ramo jepe ñane hénte, ñane reindy térã ñande ryke’y, ndaha’éi ramo jepe ñande rogagua. Umívape ñahenói ñane ánga irû, térã angirû, ñañandúgui ñañomoirûha ñane remiandúpe, ha ñande py’aite guive ñane peteĩha. Jajerovia ojuehe ha javy’a oñondive.

Ko árape ñamomba’e guasu hína Tupãsy María, ñande Iglesia sy ramo oheja va’ekue ñandéve Jesús. Ikatu porã ningo ja’e apóstol Juan ha’e hague Jesús angirũ.

Umi apóstolkuéra apytépe upe Jesús ohayhuve va’ekue. Ha ñahendu San Juan voi omombe’u ñandéve mba’éichapa upe kurusu ykére oime hague ha’e omoirũ Jesús pe isy María ndive. Ha mba’éichapa upe jave avei Jesús oheja ichupe Tupãsy María isyrã ha avei oheja pe iñangirũ ha’e ohayhuetéva isy Maríape imembyrã.

Ha upépe ikatu ñandejapa hína ñande avei jajeroviáva Jesús re ha jahayhúva ichupe. Ikatu jaike avei Tupãsy María memby ramo. Ha’e oma’ẽ haguã ñande rehe imembýre oma’ẽ haguéicha.

Jesús oheja isy María pe peteĩ familia tuichavéva, oñemosãva jeroviápe. Upéva ha’e hína upe Jesús Iglesia marangatu, ombyatýva opa umi Jesús voi ohenói va’ekue iñirũrã ha oiko vaekue hendive. Umíva opyta María pe imemby Jesús rekovia. Ha upévare ningo ñande ja’e María ha’eha ñande Iglesia sy, ñande sy.

Péva pe familia guasúpe, ha’éva ñande Iglesia, jaike hína jajeroviáva Jesús re. Jaikóva hapykuéri, ñahendúva iñe’ẽ, jahayhúva Jesús ñane angirũ ete ramo. Ha upéva pe mborayhu Jesús re ningo ochovi pe isy María korasõme. Hese ñañemboja ramo ñañembo’e ha jahayhu ramo ichupe, ndaikatúi ndajahayhúi Jesús pe. San Ignacio niko ojerurémiva Tupãsyme omoĩ haguã ichupe imemby Jesús ykére. Oikuaágui upe Tupãsy ohayhuvéva ha’e imemby Jesús. Ha pe grásia tuichave ikatúva Tupãsy rupi jajerure Ñandejárape ha’e hína Jesús tojapo ñande hegui iñirũ, iñangirũ.

Rehayhúpa Tupãsy Maríape nde sy ramo, che reindy ha nde che irũ. Ha Mba’éichapa ehechauka ehayhuha ichupe. Ehayhúpa ave ñande Iglesia ijatyhápe umi Jesús ndive oguatáva. Ha mba’éichapa ehechauka upe mborayhu.

Pa’i Alberto Luna.