Ñahendu Jesús. Domingo 19º Durante el Año

Escucha el evangelio y la reflexión en: https://youtu.be/e7V9HptlvBs

Domingo 19 Durante el Año Ciclo C. Lucas 12, 32 – 48

Upérõ Jesús he’i: Peñembosako’íke ha ani peheja pene lampĩu ogue pendehegui. Peime va’erã umi tembiguáicha oha’arõva ijárape ou jey mendahágui. Lampĩu ipópe oha’arõ hikuái upe okẽme, oipe’a haguã ijárape ombotavove. Ou porã va’erã niko umi tembiguáipe, ojevývo ijára ojuhu chupe kuéra ndokéi hína.

Che ha’e peẽme, pe óga jára voi omboguapýne chupekuéra mesápe ha ha’e voi omoĩne peteĩ-teĩme hembi’urã. Ou porã va’erã chupe kuéra, hóga jára oúrõ ojuhu chupekuéra opáy porã, tou jepe ra’e pyhare pyte térã ko’ẽ mbotávo.

Peikuaa ramo mba’e órapepa oúta peẽme mondaha, niko peha’arõta ha ndapeheja mo’ãi oike. Ha péicha peime vaerã opa ára. Peimo’ã’ỹve jave niko aju jeýne che.

Ñandejára Jesucristo ñe’ẽ

ÑAMBOGUEJY ÑANDE REKOVÉPE…

“Farmacia kuéicha nañanepohãvéima”. He’i ningo lo mitã sapy’ánte ñane retãre, gobierno ha politicokuérare. Oje’e avei péicha organización kuérare, ñande Iglésiape avei ikatu jajuhu péicha oñandúva. Ha péva hetápe omboka’apa. Noñeha’ãsevéi.

Ha’eteku rei oñemoĩtava tembiapópe, oñandu mba’eve nomboapu’a mo’ãiha. Ha umívare oiméne hína Jesús he’íva oheja hague ogue ichuguikuéra ilampĩu ha opyta pytũmbýpe. Ndohechavéi taperã, noñeha’ãsevéi iporã haguãicha, ikuerái ha ohejántema toiko la oikóva. Ha upépe hína ou oiko la oiko’ỹ va’erã. Ñande cristiano ñasẽvo ha jahejávo pe káncha oimeraẽvape. Ou mondaha kuéra oike ñande rógape, ñane comunidad pe, ñande távape, ñane retãme, ha osarambi apo ñande jake aja.

Upévare niko he’i Jesús ñandéve jajesape’a ha ñaime va’erãha ñane rembiaporãme opa ára. Ñandejára ñane patrón ojeroviágui ñande rehe, ñande reja ñandéve ikapatáicha, ñama’ẽ haguã opa mba’ére ha ñande rapicha remikotevẽre. Ani jaiko ñane akãre Ñandejára noiméi ramo guáicha, ñande ramo guáicha opa mba’e jára. Cháke oúta hína ñane patrón ñaimo’ã’ỹve jave.

San Alberto Hurtado niko he’i: “Ñane retã niko tuichave mba’e pe yvy jaikohágui, ñane retã ha’e hína pe misión ñamohu’ã va’erãva”, pe tembiapo jajapo va’erãva (“una nación, más que una tierra es una misión que cumplir”). Ha upéicha avei ikatu ja’e ñande róga, ñane comunidad ha ñande Iglesia rehe. Ndaha’éi pe ñande ñaime ha jaikohánte. Ñane retã, ñande róga ha ñande Iglesia hína pe misión ñane patrón ohejáva ñandéve ñanerembiaporã.

ÑAÑEMBO’E OÑONDIVE

Ñandejára ore Ru, embou oréve nde Espíritu Santo ore atõi ha oreresape’áva, roime haguã kyre’ỹ pópe opa araite, roma’ẽvo pe tembiapóre ha umi tapicháre nde reme’ẽ va’ekue oréve roñangareko haguã. Amén.

Pa’i Alberto Luna.