Ñahendu Jesús. Ñandejára mimbipa ára

Escucha el evangelio y la reflexión en: https://youtu.be/UUT9xryHYBQ

6 agosto: Ñandejára mimbipa ára Lucas 9, 28 – 36.

Uperõ Jesús ogueraha Pedro, Santiago ha Juánpe peteĩ sérro ru’ãme oñembo’e haguã. Ha oñembo’e aja hína, Jesús rova iñambue ha ijao katu ojajái ha morotĩ sakã.

Ha peichaháguinte katu, ojekuaa sapy’a Moisés ha Elías oñomongetáva hína Jesús ndive, ha pe ijere katu omimbipa. Ha oñe’ẽ hikuái Jesús ndive, ijeho rehe Jerusalénpe ojehekýi haguã upépe. Ha hopehýi eterei ramo jepe, Pedro ha iñirũ nguéra ndokéi. Ohecha hikuái mba’éichapa Jesús rete omimbipa ha umi mokõi oĩva hendive ave. Moisés ha Elías ohótamavo, Pedro he’i Jesúspe: — Mbo’ehára, ajépa iporãite ikatúre roime ápe. Reipotárõ, na torojapo peẽme rrancho’imimi pene rendaguã. Peteĩ ne mba’erã, peteĩ Moiséspe guarã ha Elíaspe guarã avei.

Pedro katu he’ínte pe he’íva, ndoikuaáigui rei mba’épa he’íta. Ha Pedro oñe’ẽ jave gueteri hína, ohasa sapy’a peteĩ arai omo’ãmbáva chupekuéra. Tuicha oñemondýi hikuái.

Pe araígui katu oñehendu oñe’ẽva ha he’íva: “Kóva hína che Ra’y, che aiporavo vaekue. Pejapo upe ha’e he’íva peẽme.” Ohendupávo upe oñe’ẽvape, Pedro, Juan ha Santiago ohecha Jesús ha’eñóntema oĩha. Ha are oguerokirirĩ hikuái pe ohecha vaekue, omombe’u’ỹre avavépe.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ikatúne piko ñande ñañe’ẽ Ñandejára ndive, jaguapy henondépe, térã katu ijykére ha ñañandu añete ha’e oimeha upépe ñane ndive. Ikatúpa ja’e ichupe ñaneremiandu, ha upe jave ñañandu ñande py’ápe ñane renduha ha oma’ẽha ñande rehe. Ndaha’éi ñane ño reínte
ñañe’ẽva hína. Ha’e oime añete ñane ndive. Ndajahecháiramo jepe.

Jesús niko oraha iñirũ nguéra, Pedro, Santiago ha iñermano Juan pe, peteĩ cerro ru’ãme, ha upépe ha’e oñembo’e jave Ñandejárape, ha’e kuéra ohecha mba’éichapa hendy ha morotĩ sakã pe ijao ha hova. Ohechakuaa upe jave hikuái Ñandejára oguejy hague oime haguã Jesús ndive. Ha oñeñandu porãitereíma haguére upéicha oime aja, Pedro he’i mba’érepa ndopytái ntema hikuái upépe, upe oime porãite hápe Ñandejára ndive.

Oiméne ko Jesús ombo’ese ichupekuéra oñandu pypukuve haguã pe Ñandejára mborayhu. Ikatuha ñande avei ñañandu Ñandejárape ñane korasõme. Ñahendu avei ñande ha’eha ita’ýra ha itajýra añete, ha’e ohayhúva ha oiporavóva.

Upéva omyesakãta ha omyenyhẽta ñande py’a py’aguapy ha vy’águi. Upéva ári ñamboguapýramo ñande rekove ndaipóri ñanembokuchu va’erã. Reñembo’évapa nde che irũ ha che reindy. Reñandúpa Ñandejára nde rayhuha ita’ýra ha itajýra teéicha. Ehekáramo Ñandejárape eñe’ẽ haguã hendive, eñembo’e haguã ichupe, nde avei ejupi hína pe cerro marangatu ru’ãme oguahẽ haguépe Pedro, Santiago ha
Juan, Jesús ndive, upe vy’a ijapyra’ỹva japytase hápe Pedro opytase haguéicha.

Pa’i Alberto Luna.