Ñahendu Jesús. Domingo 3º Pascua

Escucha el evangelio y la reflexión en: https://youtu.be/TDJOrWt5_JQ

Domingo 3º Pascua. Ciclo C Juan 21, 1 – 14

Upérõ Jesús ojechauka idisípulokuérape lágo Tiberias rembe’ýpe. Kóicha ojehu, oĩ jave hína oñondive Simón Pedro, Tomás ku Gemelo ojeheróva, Natanael pe Caná Galiléaguáva, Santiago ha Juan, Zebedeo ra’y, ha mokõi Jesús disípulo avei. Pedro he’i chupekuéra: — Aháta pirahápe.

Ha’ekuéra osẽ he’i chupe: — Rohóta ne ndive.

Ojupi hikuái peteĩ kanóape ha osẽ oho. Upe pyharépe ndoitýi hikuái mba’evete.

Ko’ẽmbávo, Jesús oñembo’y hína pe y rembe’ýpe. Idisípulokuéra katu ndoikuaái chupe.

Jesús oporandu chupekuéra: — Lo mitã, ndapeitýi piko mba’eve.

Ha’ekuéra he’i chupe: — Nahániri.

Jesús he’i chupe kuéra: — Peity pende rred pe kanóa akatúa gotyo, upépe heta pira.

Péicha ojapo hikuái, ha upéi nda’ipu’akái pe rred rehe henyhẽgui pirágui. Upépe, ku Jesús disípulo ha’e ohayhúva, he’i Pédrope: — Ñandejára niko amóva.

Simón Pedro ohendúvo péva, pya’e oñemonde oĩgui opívo, ha ojepoi ýpe. Umi ambue Jesús disípulo katu oguãhẽ pe y rembe’ýpe kanóape. Ombotyry ohóvo hikuái pe rred henyhẽva pirágui. 100 metroha rupínte niko oĩ hikuái pe y rembe’ýgui. Oguejývo yvýpe, ojuhu hikuái tata ha hi’ári peteĩ pira, ha pan.

Jesús he’i chupekuéra:— Peru avei umi peity va’ekuégui.

Simón Pedro ojupi jey pe kanóape ha ombotyryry pe rred henyhẽva pira guasúgui y rembe’y peve. Oĩ ipype 153 pira ha ndosorói pe rred henyhẽ ramo jepe. Upéi Jesús he’i chupekuéra: — Peju perambosa.

Avave noñanimái oporandu chupe mávapa ha’e. Oikuaa niko hikuái Ñandejára Jesucristoha. Upéi katu Jesús ojagarra pe pan ha ombohasa chupekuéra, ha péicha avei ojapo pe pira reheve. Kóva niko mbohapy vése háma Jesús ojechauka hague idisípulo
kuérape, oikove jey rire.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Heta ñañeha’ã ñamboguata haguã tembiapo porã, organización, ñembo’e, óga, komunida, ha sapy’ánte nosẽi ñandéve pe jaipotáva. Japyta ñanekane’õ, ñande ka’apa.

Jahecha apóstolkuéra Pedro ndive oñeha’ãva pyhare pukukue jave onohẽ pira ha ndoitýi mba’eve. Upe jave ou Jesús ha’e kuéra oikuaa’ỹre he’i chupekuéra moõpa oity vaerã irre. Upépe heta pira onohẽ hikuái nda’ipu’akavéi peve.

Ajépa hi’ãite che reindy ha nde che irũ, ñahendu Jesús pe ohechaukáva avei ñandéve, mba’eichaitépa ha moõ gotyopa ñañeha’ã va’erã ñamomýi tembiapo oñondive ñamboguatáva, osẽ porãite haguã ñandéve.

ÑAÑEMBO’E OÑONDIVE

Ñandejára Jesucristo, eñanduka oréve mba’etépa rojapo va’erã ideprovécho haguã hetápe umi rembiapo nde rérape rojapóva ore komunidápe. Amén.

Pa’i Alberto Luna.