Ñahendu Jesús Ñe’ẽ. Domingo 3º Tiempo Durante el Año

Escucha el evangelio y la reflexión en: https://youtu.be/4ZpZdvOGvY4

Domingo 3º Tiempo Ordinario Ciclo A. Mateo 4, 12 – 17

Jesús ohendúvo Juan ho’a hague préso, oho jey Galiléape. Osẽ Nazarétgui ha oho Cafarnaúmpe, opytáva Lágo Galiléa rembe’ýpe. Upépe niko oiko vaekue yma Zabulón ha Neftalí ñemoñarekuéra.

Péicha ou ojehu ku Isaías he’i vaekue: Pehendu peẽ Zabulón ha Neftaligua peikóva lágo jerére, ha Jordán mboypýri. Ehendu nde, Galiléa, rembyatýva pytagua. Peẽ peikóva pytũmbýpe, ko’ágã pehecháta tesape tuicháva. Peẽ peikóva ku pemanórõ guáicha ko’ágã peikovéta.

Upe guive Jesús oñepyrũ oñemoñe’ẽ. He’i: — Pejevy Tupã gotyo. Hi’aguĩma hína Ñandejára Réino.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Peteĩ sy omanóramo niko oñeporandu mávapa opytáta hekoviarã oma’ẽ haguã hóga ha imemby kuéra rehe. Sapy’ánte upe memby kuñataĩ tuichavéva opyta sýramo oñangareko ha omongakuaa michivẽva rehe. Opyta óga járaramo isy rekovia, ipyahúramo jepe oiko
sapy’a ichugui kuñakarai guasu.

Ha upéicha oiko jepi avei hasýramo, ojehekýiramo, térã katu osẽramo ñaimo’ã’ỹ hágui peteĩ omyakãva tembiapo, oike mante va’erã hendaguépe hekoviarã.Ndaikatupyrýiramo jepe mbeguekatúpe ikatu ou ojapo porãite avei pe tembiapo. “Tapére oiko la guéi” he’i voi ningo ñe’ẽ. Heta tapicha katupyry ndojekuaái noñeme’ẽigui ichupekuéra pa’ũ ohechauka haguã ikatúva ojapo.

Péina jahecha Jesús oñepyrũ oñemoñe’ẽ Juan Bautista ho’a rire cárcel pe. Upe jave Tupã oñanduka ichupe oñepyrũma va’erãha osẽ oñemoñe’ẽ. Juan niko ombyaty va’ekue hetápe río Jordán rembe’ýpe, omongarai ichupekuéra ha Jesús jepe ou hendápe oñemongaraiuka haguã.

Tuicha herakuã kuri Juan Bautista upe tetã rupi ha upévare tuicha oñeñandu ipore’ỹ ha oñeikotevẽ hekoviarã.

Juan Bautista niko he’i va’ekue voi outaha hapykuéri peteĩ tuichavéva ichugui, ha upéicha oiko añete. Ha Juan pore’ỹme hendy pe tesapeha oguerúva Jesús, oñepyrũvo he’i opavavépe: Pe jevy Tupã gotyo, peheja ichupe toisãmbyhy pende rekove. Hi’ãite vaerã
ñande avei jaheja umi mba’e ñanemomombyrýva Tupãgui, jajevy hendápe ha jaheja ichupe toisãmbyhy ñande rekove. Ha oguahẽvove ára ñande rekovia haguã jaheja avei toike ñane rendaguépe ambue tapicha ojapo porãve va’erãva tembiapo.

Pa’i Jasy.