Ñahendu Jesús. Domingo 7º Tiempo Durante el Año

Escucha el evangelio y la reflexión en: https://youtu.be/w9l1G4EECqI

Domingo 7º Durante el Año Ciclo A Mateo 5, 38 – 48

Upérõ Jesús he’i idisípulokuérape: Peikuaa oje’e hague: “Oĩ ramo ohesa mombúva hapichápe, péva tojehesa mombu. Ohãi mopẽva hapichápe, péva toñehãi mopẽ.”

Che katu ha’e peẽme: “Ani pemyengovia pe ojapo vaívape pende rehe. Oĩ ramo nderova petéva, eheja tanderova pete jovái. Oĩ ramo nde rerahaséva karai juez renondépe oipe’aségui ndehegui nde ao, eheja togueraha nde ahoja ave. Ha oĩramo oguerojaukaséva ndéve peteĩ mba’e pohýi una légua, eraha chupe mokõi. Oĩ ramo omba’e jeruréva ndéve, eme’ẽ chupe. Oĩ ramo omba’e poruséva, eiporuka chupe.” Peikuaa avei oje’eha: “Ehayhu nde rayhúvape, ha nde rayhu’ỹvape katu nahániri.”

Che katu ha’e peẽme: “Pehayhu umi pende rayhu’ỹvape, ha pene mbohasa asývape. Peñembo’e hesekuéra. Péicharõ, pehechaukáta hína pejapoha upe pende Ru yvagapegua oipotáva. Ha’e niko oheja kuarahy ojope iñañávape ha ipy’a porãvape. Ha’e hína pe oguerúva ama umi hembiapo porãvape ha umi hembiapo vaívape.

Pehayhúrõ pende rayhúvape año, piko mba’éicha Ñandejára omyengoviáta peẽme pene rembiapo. Pláta mbyatyha jepe niko péicha avei ojapo. Ha pemomaitei ha peñakãity ramo umi peikuaáva añópente, piko mba’e iporãva oĩ upévape. Umi Ñandejárare ojerovia’ỹva jepe niko péicha ojapo. Peẽ katu pende py’a porã va’erã pende Ru yvága pegua ipy’a porãháicha.”

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Ñahendu niko oje’e upérupi: Mba’érepa Ñandejára oheja hetaite aña oiko yvy apére. Mba’ére piko nohundipái umi iñañávape jaiko haguã py’aguapýpe. Ha oiméramo tapicha iñaña ha hembiapo vaíva katu ñahendu oje’e: Pévape tekotevẽ ñaipohano mbaretépe, jaikuaauka ichupe anive haguã ojapo ivaíva.

Jesús katu he’i Tupã ohayhuha opavavépe, ndoipotái avave oñehundi, ha opavavépe guarã ombou ára ko’ẽ, ama, kuarahy, yvytu. Pe mborayhu Tupã oñandúva ndaha’éi umi imba’e porãva peguarãnte. Ha’e ohayhu opavave ita’ýra ha itajýra kuérape, imba’e porã ha
iñañávape. Ha’e niko túvaicha hakate’ỹ opavavére ha opavavépe ome’ẽ imborayhu.

Ha he’i Jesús ñande jaiko va’erãha ñande ru yvágape guáicha avei. Ñane mba’e porã va’erãha iñañáva ndive, ñañembo’e va’erã ñane kontrário rehe, ñamyengovia va’erãha aña mborayhúpe. Ndaha’éi hina ñane añave ha ñande pochyvégui ñande pu’akáta añáre. Jesús
he’i mborayhu ha mba’e porãme mante ñaipohano ha ñamonguerataha aña rapykuere. Ha upéicha, che reindy ha che irũ, oikóta ñande hegui Tupã ra’y ha Tupã rajy añete.

ÑAÑEMBO’E OÑONDIVE

Ñandejára Jesucristo, rehechaukáva oréve mborayhu tuichatéva. Orembo’emi mba’éichapa ore avei romyengoviáta mba’e porãme ha ñembo’épe umi ojapo vaívape ore rehe.

Pa’i Alberto Luna.