Ñahendu Jesús. Domingo III de Cuaresma

Escucha el evangelio y la reflexión en: https://youtu.be/kuD5dfBP_wU

Domingo 3º Cuaresma Ciclo C Lucas 13, 1 – 9

Upérõ oñemombe’u Jesúspe Pilato ojukauka hague heta Galileaguápe. Ko’ã kuimba’e niko ojejuka tupaópe, iñofrénda oikuave’ẽ jave hikuái Ñandejárape.

Jesús osẽ he’i: Peimo’ã nga’u piko peẽ, umíva ojejuka hague iñangaipa hetave haguére hapichakuéragui. Nahániri. Ha peẽ voi ndapejevýirõ Ñandejára gotyo, pemanótante avei.

Pene mandu’ápa umi 18 omano vaekuére ho’árõ guare hi’árikuéra óga Siloépe. Peimo’ã piko péicha ojehu hague chupekuéra hembiapo vaive haguére hapichakuéra Jerusalenguágui. Nahániri. Ha peẽ voi ndapejevýirõ Ñandejára gotyo, pemanótante avei.

Jesús omombe’u chupe kuéra kóva ko káso: Peteĩ kuimba’e ndaje oguereko raka’e peteĩ ígo máta iparraltýpe. Peteĩ ára, oho ohecha hi’ápa, ha ndojuhúi hese mba’eve.

Upépe osẽ he’i ikapatápe: ‘3 áño háma aju ahecha hína ko ígopa hi’a, ha mba’eve ndajuhúi. Eity ñandéve. Oĩ reíma hína ko’ápe.’ Pe kapata katu he’i chupe: ‘Karai, jahejántena gueteri 1 áño. Ahapyatýta ñandéve ha ambyavevo porãta pe yvy ijerére.

Ágã hi’a ramo jaheja. Nahánirirõ katu jaity.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

“Ñamanónte va’erã voi”. He’i lo mitã. Péva jaikuaa. Ndajaikuaáinte araka’épa, ñane mitãme, ñande pyahu, térapa ñande tujápe. Mba’asýgui térãpa accidéntepe. Ñande rupápe, ospitálpe, kállepe, ñande vállepe, ñane hénte kuéra ndive térãpa estráño apytépe.

Ñahendu oikoha gérra, ñorairõ guasu ambue tetãme. Heta ñande rapicha omano itiémpope’ỹ, oha’arõ’ỹete hágui. Oime he’íva Ñandejára ombouha umía hembiapo vai ha iñaña haguére. Hesu he’i ahaniriha.

He’i, Ñandejára oñotỹha ñande rekove yvy ári itiémpope hi’a porã haguã. Ndahi’a porãi ramo ñande rapicha peguarã tembiapópe, mborayhu, ñe’ẽ porã, ñepytyvõme, niko oĩ rei yvy ape ári. Mba’evete aña nde’iséi jaikove puku nañame’ẽiramo mba’eve, nañandedeprovéchoi ramo avavépe.

San Ignacio he’i ndajaipota va’erãi jeikove puku térã mbyky, upe jaheka va’erãva hína Ñandejára tojevale ñande rehe. Ha ajépa ningo, nde che irũ ha che reindy, Ñandejára ipasiénsia ñande rehe.

Ome’ẽ ñandéve changui, ombopuku’imive ñande pláso. Ha upéa ári ave oñeha’ã ñande rehe. Omondo hembijokuái ñanerekombo’e ha ñandetyyróva sapy’ánte, jahechápa ndajajerái ha ndajajedesidíri ñande deprovecho ñande rapichápe ko áño jarekóvape, jaheja’ỹre ohasa ñande hegui vyroreípe.

ÑAÑEMBO’E OÑONDIVE
Ñandejára ore Ru, emoheñóiva ore rekove ha ore rokuáiva yvy ári, orembopy’a guasu rojapopa haguã umi tembiapo nde eha’arõva ore hegui. Tahi’a porã ore rekove. Amén.

Pa’i Alberto Luna.